Strid om politisk pynt - krev flagg på frigjeringsdagen

KrF-statsråd Knut Arild Hareide gjev svar på tiltale:

– Den dagen me blir oss sjølve nok, den dagen blir me fattige, seier Knut Arild Hareide til Vårt Land.

Sjølv brukar han anten ein KrF-pins, eller no i samband med frigjeringsjubileet, ein binders på jakkeslaget.

«Hva er galt med det norske flagget?»

Få dagar før Norge skal markere at det er 75 år sidan andre verdskrig slutta, eggar sjefredaktør Vebjørn Selbekk i Dagen til ordskifte om politisk pynt:

Skal statsrådar, folkevalde og andre i framskotne posisjonar bere FNs berekraftsmålpins på jakka - eller eit norsk flagg?

Måndag rykte Dagens sjefredaktør ut på eiga Facebook-side:

«Jeg skjønner ikke hvorfor norsk elite på død og liv skal bære FN-pinsen på jakkeslaget. Hva er galt med det norske flagget?»

Pinsen det er snakk om er sirkelrund, delt inn i 17 fargefelt, der kvar farge symboliserer FNs 17 berekraftsmål. Om berekraftsmåla seier regjeringa: «Bærekraftsmålene er verdens felles arbeidsplan for å utrydde fattigdom, bekjempe ulikhet og stoppe klimaendringene innen 2030.»

Difor går mange av statsrådane i Solberg-regjeringa med pinsen, på dressen, drakta eller blusen.

Skuldar Selbekk for populisme

KrF-statsråd Knut Arild Hareide var snar med å svare Selbekk, på eiga Facebook-side:

«Redaktør i Dagen, Vebjørn Selbekk, kan ikke forstå hvorfor noen på ‘død og liv skal bære FN-pinsen på jakkeslaget.’ Han vet utmerket godt at nålen symboliserer FNs bærekraftsmål, som er hele verdens arbeidsplan for å bekjempe fattigdom, utrydde forskjeller og bremse klimaendringene. I en tid som dette blir målene mer viktige enn noen gang. Slike populistiske utsagn Selbekk kommer med - gjør ikke annet enn å skape mistenkeliggjøring og avsporing!»

Samferdsleministeren seier til Vårt Land at han er svært overraska over Selbekks pinsutspel:

– Det er svært spesielt at det er redaktøren i ei kristen dagsavis som dreg i gang denne debatten, seier Hareide.

Til Vårt Land seier han at Selbekk med utspelet nører opp under populistiske og nasjonalkonservative krefter.

Forventar norske flagg 8. mai

– Slett ikkje, svarar Vebjørn Selbekk når Vårt Land får han i tale.

Sjefredaktøren seier at «dette ikkje er verdas viktigaste sak», men:

– Eg forventar at alle regjeringsmedlemmer går med eit flaggmerke, ikkje FN-pinsen når me kjem til fredag og markeringa av 8. mai. Dei må då vise at dei heidrar dei som heidrast skal, og då høver det med nasjonale symbol, ikkje berekraftpins.

Selbekk forklarar at han gjekk ut med pinsspørsmålet etter å ha sett talrike pressekonferansar med statsrådar no under pandemien:

– Me har ei djup nasjonal krise, med dei sterkaste inngripande tiltaka sidan 1945, me har ei arbeidsløyse som me må tilbake til 1930-talet for å finne noko liknande. I slike tider hadde eg forventa at regjeringa brukte nasjonale symbol, og ikkje ein FN-pins.

Likevel er han rask med eit tillegg:

– Sjølvsagt støttar eg opp om berekraftsmåla, og at Norge skal vere med og gjennomføre dei, det er ikkje det dette handlar om.

Utspelet til Selbekk og svaret frå Hareide, sette fyr på ordskiftet i sosiale medier. Begge får ris og ros.

Byrja med flagg

Politisk pynt er ikkje av ny dato. I alle som år som USAs president hadde George W. Bush eit lite amerikansk flagg nærme hjarta. Han festa det på jakka etter terroråtaka mot USA i 2001. «Ekte amerikanske patriotar» viste flagget.

President Barack Obama gjekk også med stars-and-stripes i metall. Men først etter litt vegring. Flaggpinsen blei eit substitutt for «ekte patriotisme», sa han til TV-stasjonen KCRG-TV.

Donald Trump nølte ikkje då han kom i 2017.

Varsla med brosjer

Ein amerikansk toppolitikar gjekk dagens kamphanar ein høg gong i bruken av symbol. Madeleine Albright, som var USA første kvinnelege utanriksminister, gav president Bill Clinton og medarbeidarane følgjande melding då kom på vakt i 1997:

Sjå på brosjene mine!

Albrights politiske pynting starta med møtet med Iraks Saddam Hussein og hans embetsmenn. På møtet bar ho ei slangebrosje på jakka, og då CNN etter møtet spurte kvifor, svarte Albright:

Fordi Saddam har kalla meg ein slange.

Etter dette bar utanriksminister Albright brosjer som politiske symbol: Ved patriotiske høve bar ho ei stor ørnebrosje. Under fredssamtalar bar ho ei fredsdue. Når ho var i strålande humør, festa ho ballongbrosja på jakka.

Men når Madeleine Albright ville vere fælsleg, bar ho ein veps. Når utanriksministeren skulle vere ekstra slu, hekk det ein edderkopp på drakta.

LES MEIR:

• Sterk kritikk mot kristnes rolle i Kongo-saken

• Selbekk skal selge KrF-politikk – inntar partiets kommunikasjonsenhet

• Ingen røde fra retningsstriden blant KrFs siste ansettelser

---

Fakta:

---