Rettssaka i Oslo tingrett mot Arne Viste og vikarbyrået Plog er nesten ved vegs ende. Torsdag skal aktor og forsvarar levere sine prosedyrar. Påtalemakta skal leggje ned påstand om straff:
– Påtalemakta ber om at Arne Viste blir dømt for brot på utlendingslovens paragraf 108 med fengsel på vilkår i eitt år, samt inndraging av 3 millionar kroner. Påtalemakta ber om at Vistes selskap, Plog AS, blir dømt for brot på utlendingslovens paragraf 108 tredje ledd til å betale bot til statskassen på 1,5 millionar kroner. Plog AS må tåle inndraging av 10 millionar kroner, seier aktor, politiadvokat Hans Petter Pedersen Skurdal, i retten.
LES OGSÅ: Historisk rettssak mot Arne Viste - har kjempa for å bli tiltalt
Aktors tal
Skurdals reknestykke er slik:
· Bot: Å ha éin arbeidstakar i arbeid som ikkje har lovleg opphald i landet, gjev i Oslo politidistrikt ei bot på 50.000 kroner til arbeidsgjevar. Tiltalen omfattar 29 personar.
· Inndraging frå Plog: Vikarbyrået har hatt ei brutto inntekt på vel 10 millionar kroner i perioden 2016-2018.
· Inndraging frå Arne Viste: Plog har vel 1,4 millionar på konto, og har gjeve 1,5 millionar kroner i gåve til organisasjonen Mennesker i Limbo, som har sett pengane på konto. Dermed har påtalemakta dekning for å inndra 3 millionar kroner frå Viste.
– Me avventar dommen, men er sjølvsagt budde på å gje frå oss gåva på 1,5 millionar kroner, seier styreleiar Tor B. Jørgensen i Mennesker i Limbo til Vårt Land.
Må i fengsel
I pausen har Viste ein knapp kommentar til aktors påstand om straff:
– Heldigvis er ikkje dette dommen, seier han til Vårt Land.
I ein kommentar til Vårt Land seier Skurdal at straffaramma for det Viste og Plog gjer, er fengsel utan vilkår, men at «det er så mange formildande omstende» i saka at han legg ned påstand om fengsel på vilkår.
LES OGSÅ: Avviser Arne Vistes tolking av Grunnloven
Men i retten krev aktor at verksemda til Viste må avsluttast.
– Held Arne Viste fram, må han i fengsel, seier Skurdal.
På spørsmål om han kjem til å rette seg etter kravet frå aktor, svarar Viste Vårt Land dette:
– Det må eg kome tilbake til, eg må først konferere med advokaten min.
Rettar til individ
I prosedyren poengterer Skurdal at Grunnloven, som Viste meiner står over utlendingsloven, ikkje gjev individrettar, men at loven er ei programerklæring:
– Viste har fått klare svar frå offentlege styresmakter. Ingen av svara støttar opp om at Grunnloven gjev individuelle rettar. Hadde lovgjevar meint noko anna, ville ein ha gjeve rettar til individet.
Når Skurdal skal måle ut straffa, dreg han fram formildande omstende:
– Saka er spesiell, Viste er ikkje ein meisterkriminell, han viser til nestekjærleiken. Han har meint det godt.
Blir ikkje utnytta
Arne Vistes forsvarar, advokat Christian Reusch, minner i sin prosedyre om at det er mange ureturnerbare i Norge, truleg rundt 3.000 personar.
– Dei kan ikkje returnere til noko annan stad, korkje frivillig eller med tvang.
Reusch ber retten ta omsyn til det fagkunnige vitne har fortalt, at «arbeid har positive sider», for vikarane i Plog «får innhald i liva sine», dei styrer unna «svarte og løynde arbeidsforhold» og dei blir ikkje utnytta.
– Viste og Plog har strekt seg langt for at dei skal vere lovlege, med tanke på skatt, pensjon, forsikring. Men har ikkje fått lov til dette, seier advokaten, og minner om at «det er ingen personleg vinning her».
LES OGSÅ: Aktor i Viste-sak: Måtte forstå at dette var ulovleg
Bør frifinnast
Vidare seier Reusch i sin prosedyre at retten må vurdere om Grunnlovens paragraf 110 om arbeid, FN-konvensjonane om økonomiske, sosiale og kulturelle rettar og om sivile og politiske rettar og Den europeiske menneskerettskonvensjon har høgare rang enn utlendingsloven, som Viste og Plog er tiltalt for å ha brote.
– Er det i samsvar med konvensjonane å nekte ureturnerbare arbeid, spør Vistes forsvarar.
På vegne av Viste ber Reusch til slutt om at Viste og Plog blir frifunne, sekundært «dømt på mildaste måte».
Ber om lågare inndragingar
Christian Reusch meiner inndragingskravet til påtalemakta er for høgt. Til Vårt Land seier han at Viste personleg har kome ut i minus, slik han fortalte i retten.
– Difor bør han ikkje få noko personleg inndragingskrav.
Når det gjeld inndragingskravet mot Plog, meiner Reusch at det maksimum kan vere snakk om 1,4 millionar kroner; det som er utbetalt i løn frå arbeidsgjevarane til Plog for dei 29 vikarane som er omtalt i tiltalen.
Dommen blir forkynt 18. oktober i Stavanger tingrett. Arne Viste er busett i Sola kommune.
LES MER OM ARNE VISTE OG RETTSAKEN:
• Dommen i Viste-saka vil påvirke kvardagen til iranske Ahmedzadeh
