Kommunevalet har sendt ei rekkje prestar inn i by- og kommunestyre:
I Hammerfest rykkjer sokneprest Jon Atle Birkeland inn som Høgre-representant. Med seg inn i kommunestyret i den nye storkommunen får han KrFs Vegard Loke Rønning, som er sokneprest i Kvalsund. 1. januar blir Hammerfest og Kvalsund ein kommune.
– Eg var prest i Hammerfest i 20 år før eg blei lokalpolitikar, fortel Birkeland, som melde seg inn i Høgre då lokalpartiet sette opp vallista i fjor.
LES MEIR: Eks-bymisjonsgeneral Helen Bjørnøy inn for SV i Lillestrøm
Skilje
Etter mange år som sokneprest er Birkeland no konstituert prost i Hammerfest prosti.
– Vil hammerfestingar sjå skilnaden mellom prosten og politikaren?
– Ja, men meiner nokre at eg ikkje evnar å skilje, vil dei nok fortelje meg dette, humrar Birkeland.
I Hammerfest har Ap fleirtalet i det nye kommunestyret, men Høgre-representanten vonar at partiet likevel kan få framskotne posisjonar.
Oppdrag
Etter to tiår i Finnmarks-byen kjem Jon Atle Birkeland til lokalpolitikken med eit sjølvpålagt politisk oppdrag:
– Vere med å gjere Hammerfest til ein kommune folk vil busetje seg i.
Når soknepresten i Kvalsund, Vegard Loke Rønning, som har vore KrF-politikar i fire år, tek plass i kommunestyret får han sjefen som kollega.
– Det kjem til å gå svært bra, Jon Atle veit skilnaden på politikk og religion.
– Kva blir di fremste sak i kommunestyret?
– Få oppstart i gruva i Kvalsund, for Nussir kan sikre arbeidsplassar og folkevekst. I dag gravlegg eg 20 og døyper 2 årleg, seier Rønning, som har budd i Kvalsund sidan 2012.
Attvalde
Men det er fleire prestar som skal styre lokalpolitikken.
I Lørenskog får soknepresten Ernst-Modest Herdieckerhoff ein ny periode for MDG. Sidan 2015 har han vore varaordførar i Akershus-kommunen.
I Lillestrøm er tidlegare sokneprest Jørgen Vik attvalt.
I Oslo blir sokneprest Espen Hasle KrFs eine representant i bystyret.
Veit du om fleire prestar som er blitt lokalpolitikarar, kontakt oss: bjbj@vl.no