Nyheter

Joshua French skal tene pengar på å fortelje om dødsdomen

Joshua French var leige­soldat i Afrika – og enda opp i fengsel i Kongo. Utanriksdepartementet brukte nesten fem millionar på ­Kongo-saka. No skal Frenchs Afrika-forteljingar fylle kulturhus.

– Eg er rysta.

Halle Jørn Hanssen er ein Afrika-veteran. Han var NRKs første korrespondent på det store kontinentet i fire år, så informasjonssjef i Norad og til sist generalsekretær i Norsk Folkehjelp, ein hjelpeorganisasjon med sterkt engasjement i Afrika sør for ­Sahara. Som pensjonist har Hanssen vore engasjert som rådgjevar i Sør-Sudan.

– Det er fullstendig grotesk. French var ein som leigde seg ut for pengar, og no skal han halde foredrag om dette i kulturhus i bygd og by.

Hanssen er opprørt over at Joshua French skal på turné. Frå oktober til februar skal French fylle kulturhus og andre scener med foredraget Dømt til døden. Første framsyning er utselt.

Turneen er organisert av selskapet Atikko, som på eiga heimside presenterer seg «en av Skandinavias største arrangører av foredrag med aktuelle, kjente og spennende personligheter».

Spenning

Atikko sel inn Dømt til døden som «en av de mest spennende sanne thrillerene som har skjedd i moderne norsk historie, med stadige vendinger og dramatikk»:

«Dette er Joshuas personlige fortelling om bakgrunnen for fengslingen og dødsstraffene i Kongo og åtte år i håp om en ­diplomatisk løsning (...) I foredraget deler han sin historie og sine erfaringer om krisehåndtering og motivasjon og om menneskets overlevelse i et av verdens farligste land. Joshua tar deg med på en utrolig spennende reise i sitt foredrag. Gripende og rystende på en gang.»

Skreddarsaum.

– Eg høyrde på podkastane då dei kom i vinter. Her snakkar ein mann som sette seg ut over loven i land med svake strukturar, seier Halle Jørn Hanssen og legg til:

– Leigesoldatar er menn som tillet seg kva som helst –mot ­betaling. I Afrika har leigesoldatar kjempa i frigjeringskonflikter, dei har delteke i kupp, dei er blitt og blir hyra inn av korrupte makthavarar som skal ha skreddarsydde operasjonar.

Hanssen seier han kjende til French og kameraten Tjostolv Molands «reelle aktivitet» før French fortalde om livet som leigesoldat til NRK i vinter.

«Gøy»

I februar publiserte NRK To hvite menn, ein podkast på seks episodar. Her fortel Joshua French at han kom til Uganda i 2008 for å arbeide som leigesoldat. Med seg i feltsekken hadde han militær opplæring frå både Storbritannia og Norge:

«Vi anså oss selv som leiesoldatar, som kontraktører, og agenter om vi måtte være det. Hele målet med Special Intervention Group Uganda var å drive leiesoldatvirksomhet», fortel French i To hvite menn.

Special Intervention Group Uganda var eit såkalla tryggingsselskap som selde tenester til kjøparar som kunne betale. French seier han arbeidde her i halvanna år før reisa inn i Kongo i mai 2009:

«Likte å gjøre alt mulig, det er gøy å være leiesoldat», fortel French i podkasten, og opplyser at jobben var å «løse oppdrag for penger».

Han understrekar at ein leigesoldat «utøver så lite vold man kan», og på spørsmål om han har skote og drepe nokon i tida som leigesoldat, seier French at «svaret mitt er nei.»

På spørsmål motivet for livet som leigesoldat var å «skape en bedre verden, eller egen ­eventyrlyst», er French sikker i sak: «Det er det siste.»

Tidleg i mai 2009 reiste Joshua French og Tjostolv Moland inn i Kongo, frå nabolandet Uganda der dei hadde base. I To hvite menn fortel French kva som hende:

«Målet vårt var å nå Kisangani by, noe vi gjorde. Der skulle vi løse et lite oppdrag, og så skulle vi dra ut av landet igjen.»

«Vi hadde med oss et våpen for å forsvare oss, en hagle. Vi hadde med oss forskjellige ting, som vi skulle utlevere, men det kan jeg ikke gå inn på nå.»

«Vi var ikke på guttetur, vi var på et reelt arbeidsoppdrag, vi skulle treffe noen, noen som var viktige. Oppdraget vi skulle løse var low-risk.»

Kven dei møtte i Kongo held French hemmeleg.

LES OGSÅ: Filmskapere ga opp den ene sannheten

Erstatning

På veg tilbake til Uganda frå byen Kisangani i Kongo går det gale. Dei to nordmennene, sjåføren dei har leigt og hans assistent stoppar i jungelen. Skot blir løyst. Sjåføren blir treft i hovudet. I podkasten fortel French at sjåføren var i live, men på spørsmål frå NRK fortel French at «vi var mer opptatt av å komme oss videre enn av å hjelpe ham».

Sjåføren døydde. Kona blei enke. «Tenker du på enken», spør NRKs journalist:

«Det hender tankene streifer innom henne. Jeg har ikke den sterke følelsen av ansvar overfor henne etter at vi har kompensert henne med disse hundretusenene som ble betalt. Jeg føler meg ikke direkte ansvarlig for hennes livssituasjon», svarar French.

Enka fekk gjennom ein privatrettsleg avtale ein erstatningssum, pengane blei mellom anna samla inn gjennom kronerulling i Norge.

Fri

Sjåføren blei skoten og drepen 5. mai 2009. Av kven er ikkje dokumentert.

French og Moland blei pågripne i Kongo, tiltalte og dømde for mellom anna spionasje, ulovleg våpeninnførsel, drapsforsøk og for å ha skipa eit kriminelt forbund.

Moland blei funnen død i cella i militærfengselet i Kinshasa i august 2013. Sjølvmord lydde først konklusjonen, men året etter blei French dømt for å ha drepe ­kameraten.

17. mai i fjor kalla statsminister Erna Solberg (H) og utanriksminister Børge Brende (H) inn til pressekonferanse for å fortelje at Joshua French same dag var blitt overført til Norge «på ­humanitært grunnlag». Han var ein fri mann.

LES OGSÅ: «Min tro»-intervju med Joshua French

UD-hjelp

Utanriksdepartementet (UD) opplyste til Nettavisen at norske styresmakter hadde brukt 4,7 millionar kroner på å hjelpe nordmennene Moland og French etter at dei blei fengsla i Kongo i 2009.

Spesialutsendinga frå UD, den røynde Afrika-diplomaten Arild Øyen, som hadde nøkkelrolla i avtalen med Kongo, sa følgjande dagen etter 17. mai-pressekonferansen:

– Ikkje noko afrikansk land har vore meir besøkt av leigesoldatar enn Kongo. Så kjem det to norske menn frå Europa, med fortid frå militære og som var i konflikt med loven. Det seier seg sjølv at dette ikkje var noko lett sak.

Teie

Halle Jørn Hanssen meiner det ikkje sømer seg for Joshua French å leggje ut på turné, og ta pengar for å fortelje om livet som leigesoldat.

– Kva bør han gjere?

– Han burde sitje heilt stille, og teie, særleg fordi staten har brukt millionar på å få han heim.

Filter

Via Kristian Jakobsen, Norges-sjef i arrangørselskapet Atikko, sender Joshua French ein skriftleg kommentar til Vårt Land:

«Det er viktig for meg å ha muligheten til å fortelle min historie uten å være bundet opp og begrenset av fangenskap i Kongo. For første gang er jeg fri til å fortelle min historie uten at media eller andre er filter imellom. Det er en sterk og unik historie som må fortelles.»

Les mer om mer disse temaene:

Bjørgulv K. Bjåen

Bjørgulv K. Bjåen

Bjørgulv K. Bjåen er journalist i nyhetsavdelingen i Vårt Land.

Vårt Land anbefaler

1

1

1

Annonse
Annonse

Les dagens papirutgave

e-avisen

Mer fra: Nyheter