Paraglider gjorde kyrkjespiret skeivt

Midt i ekstremsportbygda Voss står Vangskyrkja - med eit skeivt spir på toppen av tårnet.

Den freda Vangskyrkja frå 1277 måtte bøyga spiret då ein paraglider kom susande forbi i sommar.

Kyrkja ligg berre eit par hundre meter frå landingsplassen til dei mange paraglidarane som siglar over bygda, som er kjent for å vere ei hovudstad for ekstremsportutøvarar.

Konkurranse. Det skal ha vore ein konkurranse mellom paragliderpilotar om å kome nærast kyrkjespiret, og det enda med at den eine vann, opplyste kyrkjeverge Hans Soldal til avisa Hordaland. Politibetjent Håvard Skattum ved Voss lensmannskontor oppfordra vedkomande om å kontakte kyrkja og gjere opp for seg.

– Har syndaren meldt seg?

– Ja, han har meldt seg og vedkjent seg sine synder, seier assisterande kyrkjeverge Åslaug Styve Mjånes i Voss kyrkjelege fellesråd.

– Har han beklaga?

– Ja.

Kyrkja hadde først kontakt med paragliderklubben. Vinnaren av den uortodokse konkurransen kom sjølv på kyrkjekontoret då han kom attende frå ei reise.

Skal rettast opp. Spiret, som er frå ei stor restaurering kring 1950, er framleis skeivt. No er det ei forsikringssak, der det skal gjerast ei taksering før reparasjon.

– Er det aktuelt med erstatningssøksmål?

– Det kan eg ikkje uttale meg om, seier Styve Mjånes.

- De kan ikkje innleie eit samarbeid med klatrarar i ekstremsportbygda for å rette opp spiret?

– Dei siste gongene vi har hatt service på tårnet, har vi hatt inne eit firma med ekstremsportutøvarar som har hengt der i klatretau. Det er ikkje umogeleg at dei kjem inn i biletet igjen, seier Styve Mjånes.

Ikkje politisak. Politiførstebetjent Einar Bystøl seier at saka ikkje er meld til dei, men at dei likevel har gjort «visse undersøkingar».

– Vi har ikkje funne ut kven som har gjort det, seier Bystøl.

Politiet har ikkje planar om å gå vidare i saka.