Minnestund etter helikopterstyrt
I kveld vert det minnestund i Kinsarvik kyrkje, etter helikopterulukka.
Flagget heng på halv stang utanfor herradshuset i Ullensvang tysdag morgon. I bakgrunnen fjellområdet der eit helikopter frå Airlift med 5 personar om bord styrta ved Vassli, mellom Dalamot og Busete, i Hardanger.
Jan Kåre Ness/Scanpix
- Tanken er å kunna samlast til stille og ettertanke, seier sokneprest Bjørn Tore Sæle og ordførar Solfrid Borge til Hardanger Folkeblad.
Minnestunda i Kinsarvik kyrkje vert halden i samråd med dei to råka familiane i Ullensvang og Eidfjord. Samlinga skjer i samarbeid mellom Ullensvang herad, kyrkja og Airlift, og ho er open for alle, melder avisa.
- Det er viktig at vi samarbeider og at samlinga femner om alle, slik at ingen føler at dei fell utanfor, seier Borge.
