Planar om mega-moské i London stogga

Planane om ein gigant-moské med plass til 12.000 i London, kollapsar, ifølgje avisa The Times . Gruppa som står bak planane om det islamske gudshuset nær det olympiske senteret for London 2012, Tablighi Jamaat, er blitt fjerna frå tomta der den illegalt har hatt ein mellombels moské.

Planane om ein kjempemoské har vore kontroversielle. Det muslimske rådet i Storbritannia hevdar at gruppa er blitt offer for «ugrunna fiendskap og hysteri».

Men ein annan muslimsk organisasjon helsar avgjerda velkommen. Minhaj ul Quran som er rådgjevar for regjeringa om korleis ho kan nedkjempe ung radikalisme, seier ifølgje The Times at ein stor moské må vere ei samfunnssak og ikkje for ei gruppe med ekstremistiske band.

Gruppa som stod bak planane, har ei streng tolking av islam. Det har vore sterk motstand mot moskéen som skulle plasserast rett sør for den olympiske parken for sommar-OL om to år. Gruppa har ikkje vore i stand til å levere ein samla plan for prosjektet, skriv The Times.

Avisa skriv også at britiske terroristar har hatt band til moské-gruppa. Etterretningskjelder har uttrykt frykt for at al-Qaida brukte medlemskap i moské-gruppa for å løyve planar om angrep.