Tre typar høgskular

Studentar som i haust ønskte å studere teologi, diakoni eller sjukepleie, kunne byrje på éin ny, stor høgskule, VID vitenskapelige høgskole.

VID er ein fusjon mellom Diakonhjemmet Høgskole i Oslo og Sandnes, Høgskolen Betanien og Haraldsplass diakonale høyskole, begge i Bergen og Misjonshøgskolen i Stavanger. På veg inn er også sjukepleiarhøgskulen Diakonova i Oslo.

VID gjev utdanning innan helse- og sosialfag, teologi og diakoni samt samfunns- og leiarfag. Med unntak av gamle Misjonshøgskulen var alle dei andre høgskulane eigde av stiftingar. Misjonshøgskulen var eigd av Det Norske Misjonsselskap, som no er medeigar i VID. Høgskulen er organisert som eit aksjeselskap.

VID har rundt 3.300 studentar og 300 tilsette, og er landets nest største private høgskule, etter Handelshøyskolen BI.

LES MEIR Økt interesse for kristne lærerutdannelser

Konservative eigarar

I 2013 gjekk tre høgskular, som alle var eigde av dei store misjonsorganisasjonane, saman under namnet NLA Høgskulen. Dei som slo seg saman var NLA Høgskulen i Bergen (gamle Norsk Lærarakademi), Mediehøgskolen Gimlekollen i Kristiansand og Høgskolen Staffeldtsgate i Oslo.

Den siste var eigd av Normisjon medan Norsk Luthersk Misjonsamband (NLM) eigde Mediehøgskolen. NLA Høgskulen var eigd av organisasjonane som i dag eig den nye høgskulen, Normisjon, NLM, Det Norske Misjonsselskap, Indremisjonsforbundet, Norges Kristelige Student- og Skoleungdomslag, Søndagsskolen og Den Evangelisk Lutherske Frikirke. Høgskulen er organisert som eit aksjeselskap.

NLA Høgskolen har om lag 2.000 studentar og 200 tilsette.

Prestefabrikken

Lenge hadde Menighetsfakultetet (MF) berre eitt studium, teologi. Så blei tilbodet utvida slik at MF i dag er ein høgskule som tilbyr fleire religions- og samfunnsfag. MF er Norges største teologiske utdanningsinstitusjon, og er organisert som ei stifting.

MF har rundt 1.200 studentar og 100 tilsette.

LES MEIR Oslo får kristen lærerutdannelse

Fem åleine

Ut over desse tre store høgskulane, er det fem kristelege høgskular som i dag står åleine. Dronning Mauds Minne Høgskole er i storleik jamstor med MF, medan dei fire andre er mindre:

• Dronning Mauds Minne Høgskole, Trondheim: Tilbyr barnehagelærarutdanning, eigd av ei sjølvstendig stifting som er knytt til Den norske kyrkja.

• Fjellhaug Internasjonale Høgskole, Oslo: Tilbyr studier i teologi/kristendomskunnskap, misjon og musikk, eigd av Norsk Luthersk Misjonssamband.

• Ansgar Teologiske Høgskole: Tilbyr studier i teologi/kristendomskunnskap, musikk, psykologi og interkulturell forståing, eigd av Det Norske Misjonsforbund.

• Høyskolen for Ledelse og Teologi, Stabekk: Tilbyr studier i leierskap og teologi/kristendomskunnskap, eigd av Baptistsamfunnet og pinserørsla.

• Lovisenberg diakonale høgskole, Oslo: Tilbyr studier i sjukepleie, eigd av ei stifting.