Nyheter

Listhaug skal plukke sjefar

Innvandringsminister Sylvi Listhaug (Frp) skal i haust velje toppsjefar i både Utlendingsdirektoratet og Utlendingsnemnda.

Asylsaker toppar på nytt dagsorden i både Stortinget og regjering. No skal innvandringsminister Listhaug omsetje stortingsvedtaka frå tysdag til praktisk politikk, som Utlendingsdirektoratet (UDI) og Utlendingsnemnda (UNE) i neste omgong skal etterleve.

LES MEIR: Sylvis andre smell

Åremål

Det er nettopp til UDI og UNE Listhaug skal finne direktørar:

«Vi søker en resultat-, utviklings- og strategisk orientert direktør til å lede et arbeid med stor politisk interesse», skriv Justisdepartementet i to nesten likelydande annonser.

Toppjobbane i UDI og UNE er åremål på seks år, og det er høve til å sitje i stillinga i totalt 12 år. Begge dagens direktørar, Frode Forfang i UDI og Ingunn-Sofie Aursnes i UNE, blei utnemnt i 2012 og er snart ferdige med eitt åremål.

LES MEIR Stortinget temmer Listhaug

Storm

Rundt toppleiarane i utlendingsforvaltninga har det ofte blese hardt. To av UDIs tidlegare direktørar måtte, eller valde, å trekkje seg som følgje av avsløringar, ein fekk krass kritikk etter at han hadde slutta:

I 2001 trekte Petter Drefvelin av etter nesten seks år i jobben. Ein kritisk konsulentrapport felte han. PWC konkluderte med at produktiviteten i UDI kunne bli forbetra med 20 prosent.

I 2006 slutta Trygve G. Nordby etter fem år i jobben fordi han blei ny generalsekretær i Norges Røde Kors. Han fekk seinare krass kritikk av ein granskingskommisjonen for å ha gjennomført ein delvis lovstridig og politisk uryddig praksis ved å gje opphaldsløyve til irakarar.

I 2006 trekte Manuela Ramin- Osmundsen seg etter berre to månader i jobben. Det blei strid om ho hadde følgt saka eller hatt kjennskap til saka som felte Nordby. Ho hevda at ho ikkje kjende til irakarsakene, men valde å trekkje seg som direktør i UDI.

Eks-Ap

Dagens direktør, Forfang, blei også råka av granskingskritikk. Han trekte seg i 2006 som assisterande direktør i UDI, men blei seinare reinvaska av ein granskingskommisjon, og i 2012 klatra den tidlegare Ap-statssekretæren til topps i direktoratet. Han blei utnemnt av Stoltenberg-regjeringa.

Oppmoda

UNE har hatt langt færre direktørar sidan nemnda blei sjøsett i 2001. Dei første 12 åra var ein av utlendingsforvaltninga høgprofilerte leiarar, Terje Sjeggestad, sjef i det domstolliknande klageorganet.

I 2012 overtok Ingunn-Sofie Aursnes. Ho kom frå direktørjobben for fylkesnemndene for barnevern og sosiale sake, og blei oppmoda av dåverande justisminister Grete Faremo (Ap) til å søkje jobben ingen ville ha. For då søknadsfristen gjekk ut i mars 2012, var det ingen formelle søkjarar til stillinga.

LES MEIR UDI har fått ryddeordre av Listhaug

Signal

UNE blei etablert fordi Stortinget ikkje ønskte at sitjande ansvarleg statsråd på utlendingsfeltet kunne avgjere klagesaker på eigahand, noko som lenge hadde vore vanleg praksis. Difor minna avtroppande UNE-direktør Sjeggestad, i 2012, justisminister Faremo om at politiske signal ikkje kan endre UNEs praksis åleine. Berre endringar i lov eller forskrift vil bidra til at fleire barn får opphald i Norge, poengerte Sjeggestad. Svaret på tiltalen kom etter at Faremo uttalte at ho forventa at Sjeggestad «tok signala» om å leggje større vekt på omsynet til barna i asylsaker.

Instruere

Statsrådens makt over UNE endra seg markant i fjor. Solberg-regjeringa ville at Justisdepartementet skulle få høve til å instruere UNE. Det sa Ap og Sp ja til, så då nytta det lite at dei blåblås borgarlege vener i Venstre og KrF sa bestemt nei til endringa. Innvandringsminister Listhaug har sidan brukt retten til å instruere UNE aktivt.

I UDI og UNE får Vårt Land stadfesta at både Frode Forfang og Ingunn-Sofie Aursnes ønskjer nye åremål.

Les mer om mer disse temaene:

Bjørgulv K. Bjåen

Bjørgulv K. Bjåen

Bjørgulv K. Bjåen er journalist i nyhetsavdelingen i Vårt Land.

Vårt Land anbefaler

1

1

1

Annonse
Annonse

Les dagens papirutgave

e-avisen

Mer fra: Nyheter