Kyrkjer opnar asylkorridor

Mange av dei vel 100.000 som søkte asyl i Frankrike i fjor, ­hadde betalt store summar for å bli frakta frå land som Syria, Irak og Afghanistan til Europa – og risikert livet.

For å hindre at folk døyr på reisa, har franske kyrkjesamfunn, saman med nasjonale hjelpeorganisasjonar og franske styresmakter forhandla fram ein avtale om at det skal opprettast ein «humanitær korridor» som skal vere i drift ut året. Ein gong i månaden går det ei flylast flyktningar frå Beirut til Paris.

Frivillige. Avtalen sikrar 500 sårbare syriske og ­irakiske flyktningar, som i dag bur i ­Libanon, trygge reiser til Frankrike. Alle får reisedokument og mellombels visum, og vel ­framme blir dei innkvarterte hjå frivillige husvertar som har meldt seg til akkurat dette prosjektet.

I Frankrike leverer dei så inn asylsøknadane sine.

Partnarskap

Trusorganisasjonane som er involverte i prosjektet gjer ein framifrå jobb med å vise franske styresmakter at det er mogleg å organisere lovlege reiser inn til ­Frankrike, seier Patricia Rohner-Hégé, talskvinne i Unionen av protestantiske kyrkjer i Alsace og Lorraine (UEPAL).

– Trusorganisasjonane etablerer eit godt partnarskap mellom offentlege tenester, frivillige og flyktningmedarbeidarar i kyrkjelege organisasjonar, meiner Rohner-Hégé.

Språkkurs

Flyktningane som får tilbodet om den humanitære korridoren blir valt ut av frivillige hjelpeorganisasjonar som arbeider i Libanon, blant ­desse norske Flyktninghjelpen, og FNs høgkommissær for flyktningar. I Frankrike blir dei møtt av ­organisasjonane bak avtalen, som hjelper til med å skipe eit nettverk rundt familiane og dei single flyktningane, fortel ­Rohner-Hégé. Dei får særleg hjelp til å lære seg fransk og få barn inn i skulen.

– Til no har 92 personar kome, fortel Rohner-Hégé.

Fattighjelp

Modellen blei ­første gong etablert i ­Italia, i 2016. Initiativtakar var Sant'Egidio-samfunnet, ein katolsk lekmanns-organisasjon som særleg driv arbeid blant fattige, i Italia og i ei rekkje fattige land i Afrika, Midtausten og Mellom-Amerika. Saman med tre kyrkjesamfunn etablerte Sant'Egidio ein humanitær korridor for to år sidan for å hindre flyktningar å satse livet i forsøka på å ta seg over Middelhavet, frå Libya til Italia, i livsfarlege båtar.

Pådrivar

Dei som kom til ltalia via korridoren blei ­innlosjerte hjå frivillige i kyrkjesamfunna som stilte opp, og så leverte flyktningane inn ­asylsøknadane på vanleg måte.

Sant'Egidio-samfunnet var ein av pådrivarane for den ­franske korridoren som no er i full drift.