Kristne barnehage-gigantar fryktar meir byråkrati og mindre pengar til barna

Det er ikkje reint lite som no er sendt ut på høyring. I eit 127 sider langt høyringsnotat kjem det fram at regjeringa ønskjer ei rekkje endringar i barnehagelova, med mål om å sikre at både tilskot og foreldrebetaling går til barna.

– Dagens regelverk er tilpassa ein periode der barnehagesektoren skulle byggjast ut. No treng vi eit nytt og tilpassa regelverk, seier kunnskapsminister Jan Tore Sanner (H).

I høyringsnotatet blir det peikt ut fleire utfordringar, mellom anna at det er krevjande å føre tilsyn, vanskeleg for nye å etablere seg og tøft økonomisk for små barnehagar.

Den største foreslåtte endringa er å opprette eit nytt, nasjonalt tilsynsorgan. Organet skal ha eit heilskapleg ansvar for tilsyn med alle barnehagar som inngår i same selskap, ifølgje Sanner.

LES OGSÅ: Etterlyser meir pengar til ideelle barnehagar

Vil ha meir enn økonomi

Eit nasjonalt tilsynsorgan blir ønskt varmt velkommen av Læringsverkstedet og NLM-barnehagene, dei to største aktørane for kristne barnehagar i Noreg.

– Vi har etterlyst meir kvalifisert tilsyn i bransjen, så å få nasjonalt tilsyn er bra, seier Lars Agnar Rosten, prosjektleiar i Solkollen, barnehagane med kristen formålsparagraf i barnehagekonsernet Læringsverkstedet.

NLM-barnehagene, som ligg under Norsk Luthersk Misjonssamband, er òg glade for endringa, men begge aktørane skulle helst sett at det gjekk på meir enn økonomi.

– Vi håper at tilsynet med kvaliteten, tryggleiken og innhaldet i barnehagen, som kommunane har ansvaret for, på sikt blir ein del av eit uavhengig, nasjonalt tilsyn, seier Harald Berge Breistein, dagleg leiar i NLM-barnehagene.

LES OGSÅ: Kyrkjer sluttar å drive barnehage

Fryktar byråkrati

Både Breistein og Rosten seier dei treng å setje seg betre inn i høyringsnotatet, men uavhengig av kvarandre er dei urolege for eitt spesielt punkt. Regjeringa vil nemleg krevje at kvar enkelt private barnehage skal vere eit «sjølvstendig rettssubjekt». I tillegg ønskjer ein «forbod mot anna verksemd i same rettssubjekt som barnehageverksemda».

– Dette vil bety at alle kyrkjer og bedehus i landet må etablere eit eige AS for barnehagen sin. Årsrapport, årsmelding og så vidare, og vi som konsern må bruke mykje pengar på 232 revisjonsrapportar, i staden for at det kan bli brukt på kvalitetsutvikling for barna, seier Rosten.

– Dei fleste barnehagane våre er i dag i eitt selskap. Dersom vi i staden må ha 35 selskap som må levere 35 ulike rekneskapar, så trur vi ikkje det vil gi eit betre tilbod til borna, seier Breistein i NLM-barnehagene.

Begge aktørane fryktar rett og slett meir byråkrati.

– Eg trudde verkeleg ei Høgre/Frp-regjering var meir opptekne av å byggje ned byråkratiet, seier Rosten.

LES OGSÅ: Kjøpsjakt på kristne barnehagar

Ønskjer effektivt tilsyn

I dag kan barnehagar vere registrerte som undereiningar i eit konsern. Regjeringa skriv at morselskapet då kan ta beslag i midlane til kvar enkelt barnehage, og at offentlege tilskot og foreldrebetaling dermed kan bli brukt til å dekke tap i andre verksemder.

No ønskjer ein kvar enkelt barnehage som eige AS, stadfestar Kamilla Amundsen Willix, kommunikasjonsrådgjevar i Kunnskapsdepartementet.

– Hensikta med forslaget er å legge til rette for at tilsynsstyresmaktene på ein effektiv måte kan kontrollere at offentlege tilskot og foreldrebetaling blir brukt i tråd med regelverket, seier Willix, som fortel at dei minste aktørane vil kunne få unntak frå dette.

Rosten meiner det finst langt betre måtar å dokumentere pengebruk på enn eitt AS per barnehage.

– Dei må ikkje byråkratisere det og gjere det kostbart, dei må finne smartare måtar. Vi har ingen problem med å dokumentere pengebruken.

– Usikre på konsekvensane

I Private barnehagers landsforbund (PBL) stussar dei over at regjeringa ikkje ser nærare på eit tilskotssystem som dei meiner forskjellsbehandlar. Samstundes er PBL litt avventande.

– Vi er usikre på konsekvensane av forslaget. Vi vil i tida framover sjå nærare på dei og vurdere, seier Ole Andreas Pedersen, politisk rådgjevar i PBL.

Saka er no ute på høyring med frist sett til 26. juli. Regjeringa har planar om å komme til Stortinget med forslag til ny barnehagelov i år.

---

Private, kristne barnehagar

• Gjennom Solkollen driftar Læringsverkstedet 21 barnehagar med utvida kristen formålsparagraf. Samla driftar Læringsverkstedet over 200 barnehagar i Noreg.
• Norsk Luthers Misjonssamband driftar 35 kristne barnehagar gjennom selskapet NLM-barnehagene.
• Barnehagelova seier at «Private barnehagar og barnehagar eigd eller drivne av kyrkjelydar innanfor Den norske kyrkja kan i vedtektene fastsette særlege føresegn om trus- eller livssynsformål.» Dette betyr at barnehagar kan ha ein utvida kristen formålsparagraf.

---