Krev radikal omlegging av au pair-ordninga

Ho har arbeidd mykje med ­utnytting av utsette og sårbare grupper i Norge, som offera for menneske­handel og tvangs­arbeid – og au pairar. Gunhild Vehusheia var ­bistandsadvokat for to søstrer frå Filippinane som var involverte i rettssaka i ting­retten i fjor (sjå hovudsaka).

Ekteparet som blei dømt vedgjekk at dei hadde brote regelverket, men dei anka straffe­utmålinga. Ankesaka skal opp i lagmannsretten no i juni.

Erstatning

Vehusheia anka også ein del av ­dommen. Ho meiner søstrene må få ­erstatning for dei timane dei faktisk arbeidde hjå verts­familien. Tingretten sa at ­fordi dei ikkje hadde lovleg opphald som ­arbeidstakarar, men var au pairar, kunne dei ikkje bli tilkjent ei høg erstatning. ­Berre den eine kvinna blei tilkjent 34.200 kroner, den andre ­ingenting. Denne ankesaka er det ikkje fastsett tid for.

LES MEIR: Vertsfamiliar utnyttar au pairar 

Løn

Advokat Vehusheia ­seier innstrammingsforslaget frå Justisdepartementet ikkje vil stoppe utnyttinga av au pairar.

– Så lenge dagens ordning står ved lag, vil fattige ­kvinner frå særleg Filippinane bli ­utnytta som hushjelper i Norge.

Difor har advokaten eit radikalt ønskje om omlegging:

– Familiar i Norge har ­behov for hjelp i heimen, kvinner i ­fattige land har behov for arbeid, så lat oss kalle det hushjelper, og la dei få skikkeleg løn.

Lovverk

Vehusheia er ­sikker i ei sak:

– Endrar vi lovverket slik at dei som kjem som au pairar i dag får betalt for kvar time dei verkeleg arbeider, så trur eg det vil påverke misbruket av 30-­timarregelen.

I dag skal ein au pair ­arbeide maksimum 30 timar i hus­standen i løpet av sju dagar.

Løyner

– Men vil ­egalitære Norge finne det naturleg å ­hente hushjelper frå ­Filippinene og gje dei skikkeleg løn for å stelle hus og heim?

– Mange som brukar au ­pairar i dag vil nok ikkje finne det naturleg å hyre inn ei hushjelp. Men så lenge vi løyner ordninga bak orda au pair og kallar det kulturutveksling, ja, så vil familiar bruke ordninga. Og misbruke ho.