– 10.000 Ikea-hus til flyktningar i Irak er eit godt døme på kva vi i Framstegspartiet meiner med god hjelp i nærområda. Ved å gå over frå telt til desse flatpakka husa, vil mange flyktningar få eit betre tilvære, seier Kristian Norheim (Frp) til Vårt Land. Han sit i Stortingets utanriks- og forsvarskomité.
Med støtte frå Ikeas bistandsorganisasjon har det svenske designselskapet Better Shelter utvikla eit byggjesett som tåler mykje vind og ver. I løpet av nokre timar blir 71 røyr og 35 plastpanel sette saman til eit hus som kan romme ein familie på seks.
Etter at prototypen er prøvd ut med suksess i flyktningleirar i Etiopia og Irak, har FNs høgkommissær for flyktningar (UNHCR) no tinga 10.000 plasthus som skal setjast opp i leirar i Irak. Ikea-huset er tre gonger dyrare å produsere enn teltet UNHCR set opp i dag, men det har lengre levetid – og bukvaliteten er langt betre.
– Dei representerer ei dramatisk forbetring i liva til mange menneske som er ramma av kriser, seier avdelingsleiar Shaun Scales i UNHCR.
Èin milliard
På Frps landsmøte gjorde partiet vedtak om å omdisponere midlar i bistandsbudsjettet for å hjelpe fleire flyktningar i nærområda til Syria. To dagar før Frp-vedtaket varsla statsminister Erna Solberg (H) at det blir gjort i revidert nasjonalbudsjett, som regjeringa la fram tysdag:
– Regjeringa vil i revidert nasjonalbudsjett auke støtta til humanitær innsats og utviklingsaktivitetar i Syria og nabolanda med 250 millionar kroner, slik at den totale norske støtta i år blir på éin milliard kroner. Støtta går blant anna til mat, helse, husly, utdanning, vatn og sanitære tenester, seier Erna Solberg.
Sidan borgarkrigen i Syria starta i 2011 har Norge ytt nesten tre milliardar kroner i bistand til Syria og regionen.
LES OGSÅ: Tre krav frå flyktningsjefen
Mange internflyktningar
Haldninga til dei blåblå utfordrar resten av Stortinget. Eit vedtak samlar støtte i seks parti: Norge bør ta i mot 10.000 syriske flyktningar i år og neste år, seier KrF, Miljøpartiet Dei Grøne (MGD), Arbeidarpartiet, SV, Senterpartiet og Venstre.
Samstundes tek Ap, KrF og MDG til orde for å bruke meir pengar i nærområda til Syria for å avhjelpe den enorme flyktningkatastrofen som berre veks i omfang:
• I Syria og Irak, som er heimsøkt av krigen mot Den islamske staten (IS), er det vel 11 millionar internflyktningar.
• Krigen i Syria har sendt nesten fire millionar syrarar på flukt til naboland.
• Store flyktninggrupper frå Syria er på reise mot Europa, blant anna over Middelhavet.
LES OGSÅ: EU: – Det viktigste er å redde liv i Middelhavet
Endre bistandsbudsjettet
Framfor å hente fleire syriske kvoteflyktningar til Norge, vil Frp og Høgre heller bruke summen det kostar i landa som strevar med store grupper med internflyktningar , og i landa som mottek flyktningstraumen frå særleg Syria.
– Vi kan hjelpe langt fleire på denne måten, seier Norheim.
Arbeidarpartiet, som ivrar etter å hente 10.000 syriske flyktningar til Norge, vil også vri bistanden:
– Eg har tidlegare meint at vi faktisk kunne omprioritert midt i året for å prioritere meir til Syria, sa Ap-leiar Jonas Gahr Støre til Vårt Land nyleg.
KrF vil som Ap at Norge skal ta i mot 10.000 syrarar samstundes som Norge brukar endå meir i Syrias nærområde: Minst tredoble den humanitære støtta i nærområda til Syria frå 512 millionar kroner i 2014.
Følg oss på Facebook og Twitter!
Skifte ut
I fjor vedtok Frps landsmøte at Norge skal vere ein pådrivar for at alle flyktningar skal bu i Ikea-hus, og ikkje i telt.