Nyheter

Færre tek abort i Norge

Norge må få ein strammare abortlov, krev KrF. Her er tala dei kan ta med seg inn i regjeringsforhandlingane.

Folkehelseinstituttet (FHI) administrerer abortregisteret, som fortel korleis stoda er i Norge - og hovudtrenden er tydeleg: Talet på uønskte svangerskap blant kvinner under 25 år går ned.

Vi har den lågaste abortraten i Norden for tenåringar. Denne trenden flyttar seg oppover i aldersgruppene etter kvart. Det ser FHI som eit teikn på at ungdomskulla etter 2006 har blitt betre på å unngå uønskte svangerskap – og dei tek framferda med seg inn i vaksenlivet.

LES MEIR: Sp kan sikre abortseier

Nedgang

Det blei utført 12.733 svangerskapsavbrot i Norge i fjor. Rata går ned for alle aldersgrupper; frå 11,0 per 1.000 kvinner (15–49 år) i 2016 til 10,6 i 2017.

Av alle abortar var 95,7 prosent sjølvbestemte, og 81,2 prosent av dei var utført før 9. veke, opplyser FHI. Sidan 2008 har dei fleste sjølvbestemte svangerskapsavbrota blitt utført medikamentelt – i fjor brukte nesten ni av ti denne metoden.

Alle abortar etter 12. veke må handsamast av ei abortnemnd. I fjor blei det utført 546 nemndbehandla avbrot, som utgjer om lag fire prosent av alle avbrot. 527 blei innvilga i primærnemnd.

Variasjon

Fram til 2015 var abortraten høgast for kvinner tidleg i 20-åra, men også her har raten falle frå 30,2 i 2008 til 18,0 per 1.000 kvinner i alderen 20–24 år i 2017.

Aldersgruppa 25–29 år har overteke som den aldersgruppa som har den høgaste abortraten med ein rate på 19,1, men også i denne aldersgruppa er abortraten fallande.

Det er stor regional abort­variasjon. På topp ligg kvinner i Finnmark, Oslo og Troms, medan kvinner i Sogn og Fjordane, Møre og Romsdal og Aust-Agder held til på botnen av skalaen.

LES MEIR: KrF møtes med abortkrav

Tvillingabort

Sidan Helsedepartementet i 2016 slo fast at det er lov med tvillingabortar av friske fostre, er det utført 25 slike abortar. Totalt er det utført 38 fosterreduksjonar av tvillingar sidan 2016. 13 abortar var grunngjeve med sjukdom hjå foster.

Kvart år blir det fødd kring 70–80 barn med Downs syndrom, frå 2000 har talet vore heller stabilt, melder FHI. Denne stabiliseringa har funne stad parallelt med at gravide kvinner har fått tilgang til screening i svangerskapet. Resultat: Talet på nemndhandsama svangerskapsavbrot har auka.

I 2016 blei 120 abortar nemndhandsama grunna kromosomfeil og 67 grunna Downs syndrom.

Les mer om mer disse temaene:

Bjørgulv K. Bjåen

Bjørgulv K. Bjåen

Bjørgulv K. Bjåen er journalist i nyhetsavdelingen i Vårt Land.

Vårt Land anbefaler

1

1

1

Annonse
Annonse

Les dagens papirutgave

e-avisen

Mer fra: Nyheter