Erfarne tiggarar gir mindre misnøye

– Vi oppfattar at det har vore mindre uro og misnøye knytt til tigging i sommar, seier Kari Gran, leiar for bymisjonskafeen Møtestedet i Oslo.

Somrane har dei siste åra vore sesong for tilreisande tiggarar, og med det har misnøye mot tigging i offentleg debatt følgt etter. Men i år har det vore stille om tigging.

LES MEIR: Tiggarstøtte er ikkje trekkplaster

Tilpassing

Kirkens Bymisjon har ikkje grunn til å tru at det er færre tilreisande som tiggar i år, enn tidlegare år. Dei trur heller at dei som kjem for å tigge, kjenner byane betre og er meir erfarne i Norge.

– Det går litt opp og ned, men dei som har vore her fleire gongar tilpassar seg tilhøva her. Dei har gjerne sine stader, og har relasjonar til dei som er i nærleiken, seier Gran.

Ho trur at dei tilreisande etterkvart har tilpassa framgangsmåtar og opphaldsstadar for å vere mindre til bry, og i tillegg tilpassa tidene å vere i Norge på.

– Dette er ein marknad. Dei seier at i juli når Oslo er litt tømt for folk, og det er mange turistar, då er det mindre gunstig å tigge. Nokon kjem tilbake før jul. Dei er flinke til å lese marknaden sin, og tilpasse seg, seier Gran.

LES MEIR: Kommunar jager tiggarar

Støtte

Sidan 2013 har friviljuge organisasjonar kunne søke om pengar gjennom Tilskotsordninga for humanitære tiltak til tilreisande EØS-borgarar som tiggar.

Etterkvart har det blitt fleire tilbod om overnatting, og då har tiggarar mindre behov for å sove ute på gater, i parkar eller i skogen. I tillegg har fleire blitt i stand til å ordne overnatting sjølve, ifølgje Gran.

– Eg håper at det lettar situasjonen for dei å dekke grunnleggande behov, som dusj og ein plass og sove. Men det å vere på reise og tigge er framleis ein enormt sårbar situasjon, seier ho.

Slutt på forbod

Gran har inntrykk av at det heller ikkje er like mykje misnøye og uro knytt til tiggarar i andre delar av landet.

Sommaren 2014 vedtok Stortinget at det var opp til kvar kommune å bestemme om tigging skulle vere lov eller ikkje i kommunen. Tre kommunar har sidan innført tiggeforbod. Først ute var Lillesand i 2014, før Sola og Os vedtok forbod våren 2017.

Men der har det stoppa – og gått baklengs. I mai i år vedtok kommunestyret i Lillesand å avvikle forbodet etter fire år.

Ønskjer forbod

Aina Stenersen, som sit i Oslo bystyre for Frp, meiner at situasjonen ikkje har endra seg.

– Vi meiner det framleis er ei utfordring, og at eit forbod er løysinga. Det løfter ingen ut av fattigdom å tigge, vi vil heller ha andre tiltak som kan hjelpe betre.

– Kva tiltak er det?

– Vi bør heller sende midlar til dei aktuelle landa for at dei kan få betre forhold i landet sitt. Det er mest framtidsretta, seier Stenersen.

Borte frå skogen

Ho meiner at tilreisande tiggarar fører med seg ein del forsøpling og sanitetsutfordringar – både i byen og i skogsområde utanfor byen.

– Kommunen bruker mange ekstra millionar på å rydde i skogen, det blir store utgifter.

– Bymiljøetaten seier til NRK at det er færre tiggarar i skogane, og at det ikkje er eit utbreidd problem i år. Meiner du likevel det er eit problem?

– Dei har rett i at det er mindre rot i skogane, det er fordi at dei har flytta inn på overnattingstiltak. Då blir utfordringane flytta ein anna plass, for overnattingstilboda gjer at nabolaga rundt blir plaga av tilgrising og forsøpling, seier Stenersen.