– Kvifor vel dei fire store partia alle å seie nei til fleire relokaliserte flyktningar, biskop Halvor Nordhaug?
– Det skuldast kanskje valkampen som er i kjømda? Eg veit ikkje om fleire flyktningar til Norge er noko «god sak» for desse partia.
Dei fire største partia, Arbeiderpartiet, Høgre, Senterpartiet og Framstegspartiet, seier alle nei til å etterkome Italias bøn, melde Vårt Land i går.
Italia slit med å handtere vel 200.000 asylsøkjarar og migrantar. Men bønene om avlastning blir sagt fram for dauve øyre i Norge.
– Norge kan ikkje sei ja til å ta i mot fleire no. Vi har både oppfylt den ekstra kvoten med kvoteflyktningar og dei ekstra som kom via EUs relokaliseringsordning. No må Norge bruke ressursar på dei som skal integrerast, få dei ut i utdanning og jobb, sa parlamentarisk leiar i Senterpartiet, Marit Arnstad, til Vårt Land tysdag.
LES MEIR De fire store partiene asylstenger Norge
Avlaste
Den avvisande haldninga til dei fire store provoserer biskop Halvor Nordhaug i Bjørgvin bispedømme.
– Norge skal ha ros for tidlegare å sagt ja til EU om å ta ekstra flyktningar frå Italia og Hellas, og for slik å ha avlasta desse to landa. Men dette må ikkje hindre oss frå å halde fram med å vere rause, seier biskopen, og legg til:
– Er det éitt land som er i stand til å gå den andre mila, ja, så er det Norge. Vi har sterke sosiale og økonomiske ressursar.
Få
I 2015 kom det rekordmange éin million flyktningar og migrantar til Europa. Hausten for snart to år sidan blei difor EU samde om at dei 28 medlemslanda skulle ta i mot 160.000 asylsøkjarar frå særleg Italia og Hellas for å avlaste to hardt prøva land som tok i mot særs mange.
Men relokaliseringstavtalen har smuldra opp. Hittil er berre 21.000 sendt vidare til eit tredjeland. EU er sterkt splitta for både Polen og Ungarn nektar å ta ein einaste ekstra asylsøkjar.
Medan Italia prøver å handtere dei som kom i 2015, har landet fått nesten 90.000 nye asylsøkjarar og migrantar hittil i år. Totalt husar Italia no vel 200.000 menneske som har kome i båt over Middelhavet.
I Hellas strevar styresmaktene med å handtere vel 60.000 flyktningar som stranda i landet etter at EU signerte ein avtale med Tyrkia i fjor, ein avtale som seier at Tyrkia skal stoppe flyktningar som vil til Hellas.
Vise veg
– Norge ligg langt nord i Europa, og får difor få asylsøkjarar om dagen. Men vår geografiske plassering må ikkje hindre oss i å ta i mot menneske som treng vern, seier biskop Nordhaug.
– Kvifor skal Norge seie ja til å avlaste Italia og Hellas?
– Situasjonen er svært kritisk og kallar på solidaritet. Vi kan vise resten av Europa at vi er villige til å stille opp for dei to landa.
LES MEIR Listhaug rullar ut folkeskikkurs
Sut
I Italias er landets politiske leiarar villige til å prøve uvanlege tiltak for å få andre europeiske land til å stille med hjelp. Italia har trua med å dele ut visum til dei som kjem båt over havet slik at dei kan reise vidare nordover i Europa. Landet har også trua med å stengje italienske hamner for private hjelpeorganisasjonar som plukkar opp menneske på havet, menneske som i all hovudsak kjem med gummibåt frå Libya.
Biskop Nordhaug sit i Bergen og følgjer nyhendemeldingane frå Middelhavet. Han har ei stor sut:
– Tenk om Italia går til det steget at dei seier at nok er nok, og sluttar å gå ut på havet for å redde dei som prøver å ta seg over.
Døde
Minst 2.361 menneske har mista i forsøket på å ta seg sjøvegen til Europa frå januar til juli i år, melder Den internasjonale organisasjonen for migrasjon (IOM).