KOMMENTAR:
Vi trudde ikkje det vi såg og høyrde
Den nye boka som fortel om Joe Biden si sviktande helse er ikkje overraskande lesing etter året vi har lagt bak oss. Men den skildrar kanskje den største politiske skandalen i moderne tid, og gjev grunn til ettertanke.
FERDIG: Joe Biden gav seg i valkampen i slutten av juli 2024. Han hadde sett sliten ut lenge.
Susan Walsh / AP / NTB
Rådgjevarane til presidenten vurderte om det var naudsynt å setje han i rullestol. Han fekk manus til alle samanhengar, også lukka møter med si eiga regjering. Han hadde nesten ingen offentlege møter før ti eller etter seks, og tok relativt ofte fri heile helger. Han fekk i større og større grad problem med språk og uttale, og taleskrivarane begynte å skrive «Presidenten/statsministeren i [land]» i staden for namnet på statsleiaren presidenten skulle møte eller snakke om. Stemma hans bar nesten ikkje lenger.
Hollywood-produsent Jeffrey Katzenberg, ein prominent demokrat, rekrutterte den legendariske filmskaparen Steven Spielberg for å jobbe med lyssetjing og betre mikrofonar til presidenten sine arrangement, og Spielberg gav presidenten råd og tips til framføring før store talar.
Det er som henta ut av ei bok, og det er det. Dessverre er den aktuelle boka ikkje ein roman, men sakprosa.
