Vi må framleis vise interesse for Ukrainas motstandskamp
Putin-regimet gamblar på at Vesten vil miste interessa for Ukrainas kamp mot den russiske invasjonen. Å vise interesse for den ukrainske motstandskampen, er derfor ei stadig mektigare form for støtte.
MINNET: Det er lett å miste fokus i ei verd full av uro, men den ukrainske fridomskampen treng oss og merksemda vår, skriv Vårt Land på leiarplass.
Jae C. Hong/AP
Dette er ein leiar. Leiaren gir uttrykk for Vårt Lands syn. Sjefredaktør og politisk redaktør har ansvar for innhaldet.
Ukrainske og russiske soldatar døyr i skyttargravene på ukrainsk jord. Etter at Hamas gjekk til åtak på Israel 7. oktober, har det blitt større kamp om merksemda for den ukrainske motstandskampen. I eit ferskt intervju med den høgståande russiske diplomaten Rodin Mirosjnik, legg han vekt på denne dynamikken.
Mirosjnik fekk ei ambassadørstilling for å samle bevis om påståtte ukrainske overgrep mot sivile. Han seier Russland kan «motstå Nato» så lenge det er naudsynt. Analysen hans er at Vesten etter kvart vil miste interessen for ukrainarane sin kamp mot den russiske invasjonen, og at styresmaktene i Kyiv utan denne støtta vil kollapse.
