I ei tid der alt går berre raskare og raskare, er det viktig å innimellom dukke djupare ned i eit emne. Litteraturen er ein stad der det framleis går an å bli verande, lenge, kanskje fleire timar i strekk. Å sette av tid til å lese bøker, synest viktigare enn nokon gong.
I haust startar Vårt Land eit nytt konsept som vi har kalla for Litterært skriftemål. Det første arrangementet skal vere på Kulturhuset i Oslo i kveld, der Levi Henriksen er gjest. Henriksen skulle vere kjent for dei fleste Vårt Land-lesarar både som mangeårig spaltist i avisa og som forfattar av bøker som Feber, Snø vil falle over snø som har falt, Bare mjuke pakker under treet og Dagen skal komme med blå vind.
LES OGSÅ: Religion på litterært alvor
Syngande søsken
I haust er Henriksen aktuell med romanen Harpesang, som blir utgangspunktet for kveldens eksistensielle bokbad. Romanen handlar om den litt rustne plateprodusenten Jim Gystad, som i ein barnedåp på Kongsvinger får bakoversveis av tre syngande søsken på rundt 80 år. Dei syngande søskena er pinsevennar, og har ei suksesskarriere (langt) bak seg både som kristeleg turnéband i USA og som bestseljande plateartistar i Hedmark.
Lågkyrkjeleg
Henriksen er i denne romanen endå tettare innpå eit lågkyrkjeleg miljø som vi også kjenner frå andre bøker i forfattarskapet. Dette miljøet skildrar han med både humor og varme, og med sterk sans for vittige og karakteriserande detaljar. Lesarar som har ein viss kjennskap til lågkyrkjelege miljø, ikkje minst den musikken som blei gitt ut på det kristne plateselskapet Klango i perioden 1959 til 1991, vil truleg ha bonusutbytte av Harpesang. Sjølv har eg ikkje vakse opp med denne musikken, men synest likevel at Henriksen gir eit fascinerande portrett av eit mangslunge bedehusmiljø. Under samtalen i kveld skal vi snakke meir om kvifor Henriksen er så opptatt av det lågkyrkjelege, og korleis dette innverkar på bøkene hans.
LES OGSÅ: - Jeg måtte riste den kristne troen av meg for å overleve
Utover hausten blir det eit nytt Litterært skriftemål kvar månad, der vi tek for oss nokre av bøkene som er aktuelle no. For alle som ikkje har høve til å få med seg arrangementa i Oslo sentrum: Les Vårt Land, så skal vi halde deg oppdatert!
