Det er vanskeleg å tru på KrFs Bollestad-fortelling
Her er det vi veit som skjedde inne i møterommet til KrFs sentralstyre då Olaug Bollestad valde å trekke seg som partileiar.
STEMNING: – Spenningane mellom aktørane i møtet skal ha vore sterk og ubehageleg, og skal ha bidratt til at møtet ikkje tok slutt før langt på kveld, skriv Emil André Erstad.
Heiko Junge / NTB
Etter KrFs maratonmøte måtte nestleiarane Dag Inge Ulstein og Ida Lindtveit Røse stå til rette som to parallelle utgåver av «Komiske Ali». Nesten uansett kva dei fekk spørsmål om, var svaret at «Olaug fatta si avgjerd» og at dei to hadde stor respekt for denne avgjerda. Det sa dei trass i at Olaug Bollestad få minutt tidlegare hadde sagt leiinga hadde mislukkast i å finne ei løysing, og at ho derfor hadde bestemt seg for å gå av. Alle kunne forstå at det eksisterte eit stort press mot henne.
Sanning med modifikasjonar
I politisk kommunikasjon er det viktig å snakke sant. Ein viktig regel er at du som politikar ikkje treng å seie alt som er sant, men at det du seier må vere sant. Då Ulstein og Røse sa at Bollestad hadde fatta avgjerda, var det i og for seg sant – slik Vårt Land kjenner detaljane frå møtet. Det er likevel ei sanning med modifikasjonar, ettersom Olaug Bollestad kjempa ein desperat kamp for sitt politiske liv dei siste vekene. Ho skal ha kjend seg under eit massivt press, og opplevde prosessen som eit resultat av maktkamp og kupp. Nestleiarane Ulstein og Røse sa etterpå at dei ikkje skal ha pressa henne til å gå.
