Bønerop frå bomberom
I eit bomberom i Kharkiv har den russisk-ortodokse Ivan mange gonger måtte gøyma seg for rakettar som hans eigen patriark har velsigna.
KHARKIV: Brannvesenet sløkker ein brann etter russisk bombardement, 3. mai i år.
Felipe Dana / AP / NTB
Nesten dagleg får eg meldingar frå Ivan i den krigsherja ukrainske byen Kharkiv. Han fortel om tragedien i heimlandet. Ivan er russisk-ortodoks kristen, medlem av kyrkja som vert styrt av Moskva-patriark Kirill. Eg spurte ein dag kva han tenkjer om at patriarken hans støttar Putins krig.
Ivan svarte med å senda bilete av tomme barnevogner på Rynok-plassen i Lviv. Aksjonen «Krigens pris» starta i midten av mars, som protest mot at minst 109 ukrainske barn til då var drepne. Like etter sende Ivan meg bilete av døde barn og skreiv at «dette er resultatet av spesialoperasjonen for å av-nazifisera Ukraina».
Det var svar nok. Det er ein avgrunn mellom patriarken i Danilov-klosteret i Moskva og den djupt truande Ivan i patriarkens eiga kyrkje i Kharkiv.
