Nyheter

Slik skal ho stanse internasjonale spelselskap

Kulturminister gjev friske millionar, og vil fortelje norske pengespelarar at utanlandske spelselskap ikkje bidreg til å styrkje frivilligarbeidet.

Hjelpeorganisasjonen Spilleavhengighet Norge jublar:

– Dette er eit kjempeflott tiltak. Reklamen for utanlandske nettspel, særleg casinospela, må stoppast. I haust registrerer vi at fleire melder om speleproblem, seier leiar Lill-Tove Bergmo.

Kulturminister Thorhild Widvey (H) har ansvar for både idretts-, spel- og frivilligpolitikken. Difor intensiverer ho kampen mot internasjonale spelselskap i regjeringas nye Handlingsplan mot spilleproblemer.

– I denne saka gjev vi oss ikkje. Vi godtek ikkje at selskap som korkje styrkjer den norske frivilligkulturen eller har ansvarlege spel hentar ut store summar ved at nordmenn spelar hjå selskap som opptrer som om dei har lisens til å tilby spel – noko dei slett ikkje har, eller kjem til å få, seier kulturminister Widvey.

LES OGSÅ: Oljefondet milliardgambler på kasino

Handlingsplan

Statsråden har fleire mål med den nye handlingsplanen, som er for 2016-2018:

• Få ned talet på speleavhengige.

• Tilby betre behandlingstilbod.

• Gjere det vanskelegare for internasjonale spelselskap å operere i Norge.

Massiv reklame

Kampen om nordmenns spelkroner er tøff. På den eine sida står statens monopolselskapet Norsk Tipping. På den andre utanlandske gamblingsselskap som pøsar på med reklame via to TV-kanalar som sender frå utlandet, og dermed omgår det norske reklameforbodet.

LES OGSÅ: Slippreklame for én million om dagen

Omgår reklameforbod

Men store, utanlandske spelselskap bombarderer norske TV-sjåarar med pengespel. For kvar krone Norsk Tipping og Rikstoto brukar på å nå deg, brukar dei utanlandske selskapa tre gonger så mykje.

To TV-kanalar sender reklame for spel som er ulovlege i Norge. Men fordi selskapa sender reklamen frå utlandet, blir han ikkje stoppa av det norske lovverket. Både Discovery Networks – TVNorge – og Modern Times Group (MTG) – Viasat og TV3 – sender frå Storbritannia som tillet reklame for ulisensierte pengespel.

Vil nå unge

Nyleg møtte kulturministeren Discovery Networks og MTG for på nytt å fortelje at ho mislikar at dei sender reklame for utanlandske spelselskap på sine kanalar som sender frå utlandet.

– Eg forklarte TV-selskapa at vi meiner spelselskapa opptrer slik at mange nordmenn trur at dei har lisens til å reklame for pengespel. Men det har dei jo ikkje. Og det skal vi no fortelje forbrukarane.

– Kva respons fekk du på den appellative tilnæringa?

– Dei hadde ikkje gehør for våre synspunkt.

– Men likevel skal du vinne kampen mot dei?

– Ja, no skal vi bruke tre millionar kroner meir på handlingsplanen, 15 millionar mot tidlegare 12. Dei ekstra millionane skal Lotteritilsynet mellom anna bruke til kampanjar som skal fortelje at utanlandske spelselskap ikkje har løyve i Norge, og at forbrukarane dermed ikkje kan rekne med det same vernet som dei har har om dei spelar på norske spel som har eit ansvarleg regime.

– Kven skal du nå?

– Alle som spelar via utanlandske selskap, men aller helst dei unge spelarane som har vakse opp med eit godt tilbod i det lokale idrettslaget, men som no er med på å uthole frivilligøkonomien ved at dei sender pengar til selskap som slett ikkje støttar denne viktige, norske dugnaden.

LES MER: Britene strammer inn på spillselskaper

Knapp kommentar

Harald Strømme, sjefredaktør og administrerande direktør i Discovery Networks har ein knapp kommentar til møtet og Widveys strategi:

- Det var eit ryddig møte der partane fekk sagt sitt. Eg ønskjer ikkje å kommentere saka utover det.

Les mer om mer disse temaene:

Bjørgulv K. Bjåen

Bjørgulv K. Bjåen

Bjørgulv K. Bjåen er journalist i nyhetsavdelingen i Vårt Land.

Vårt Land anbefaler

1

1

1

Annonse
Annonse

Les dagens papirutgave

e-avisen

Mer fra: Nyheter