Når ungdomstrua blir nedvurdert
THE SEND: Brørne Ingebrigtsen haustar jubel når dei går «all in». Men kristen ungdom får visst ikkje den same tilliten.
Misjonskonferansen The Send, som er planlagt komande juni, og er eit svært breitt samarbeid mellom ulike aktørar i Kristen-Noreg, har i det siste skapt ein viktig debatt om unge kristnes engasjement. Debatten får dessverre også fram ei side ved den skepsisen som ofte vert kristne ungdomar til del. Mykje tyder nemleg på at dei ikkje får same tilliten og armslaget som ungdomar i andre miljø.
Debatten har også gitt oss eit slags djupdykk i uttrykket å gå «all in». Det kan høyrast ut som om dette er ei spesialdesigna grøft for kristne ungdomar, endå alle som har vore unge veit at det er eit allment fenomen (og slett ikkje berre er dumt). Unge har ei eiga evne til å gi seg heilhjarta i kast med ting, anten det er miljøvern, musikk, politikk eller poesi.
Eller gudstru. Det er ikkje slik at dei vaksne si ferdigpolstra forsiktigheit er det som freistar mest når ein er 17.
