Ansvarleggjering, ikkje latterleggjering
KJØNNSROLLAR: Subjekt-redaktør Danby Choi har rett i ein ting: Likestilling er ikkje eit nullsumsspel. Då er det rart at han forsvarer at unge menn ser opp nettopp til folk som hevdar at likestilling for kvinner står i vegen for deira eigne ambisjonar.
KRITIKK: – Choi legg ansvaret for at unge menn og gutar ønsker å stemme Trump over på meg og dei som ikkje automatisk godtek premissen i hans argumentasjon. Kven kan eg legge ansvaret for mine kjensler på, spør Mai Lene Hæåk. På biletet: Danby Choi, sjefredaktør i Subjekt.
Erlend Berge
Choi hevdar i tilsvaret til min kronikk i Vårt Land 25. november at eg latterleggjer dei som synest synd på unge gutar. Det stemmer ikkje. Choi har rett i at gutar tapar på mange statistikkar, og nettopp derfor meiner eg at fleire av konklusjonane i Mannsutvalet sin rapport er så viktige: Dei løftar gutane og mennene utan at det går utover kvinnene.
Blandar Choi?
Det verkar for meg som om Choi blandar latterleggjering med ansvarleggjering. For det eg ønsker er å ansvarleggjere unge menn og kor dei hentar inspirasjon. At dette skal vere latterleggjering i ei tid kor Jordan Peterson kjem med relativt enkle grep for å vere meir disiplinert, og kor tusenvis av nordmenn benkar seg framfor Kompani Lauritzen to gonger i året for å sjå på at undommar og kjendisar blir møtt med krav og streng disiplin, er eit paradoks. Unge menn må rett og slett tole å høyre at Trump og andre som snakkar ned kvinner og likestilling ikkje er ei inspirasjonskjelde, og dei må ta ansvar for kva dei løftar fram som gode førebilete.
