Marianne Vollan er direktør i Kriminalomsorgsdirektoratet og har sett tendensen til radikalisering i fengsla vekse.
– Eg vil ikkje seie noko om det detaljerte omfanget. Men det er eit område vi har sett på over lang tid, og det er klart at omfanget har auka noko. I lys av dei terrorangrepa vi har sett i den siste tida, vil Kriminalomsorgsdirektoratet sende ut eit skriv med informasjon til alle våre tilsette om kva forhold dei bør vere merksame på.
– Kva er dei nye strakstiltaka?
– Det er tre tiltak: Team av livssynsarbeidarar, mentorordning og kunnskapsauke (sjå faktaboks). Det kan vere ting som er lette å få auge på, men også fleire ting som kan vere vanskeleg å oppdage. Då er meir kunnskap veldig viktig. Vi ser også på kva fangar som skal bli plassert saman.
– Er dei nye tiltaka ein direkte konsekvens av dei nylege terroråtaka?
– Nei, tiltaka er del av handlingsplanen til regjeringa som blei lansert i fjor. Den er ein respons på det aukande omfanget av radikalisering.
LES MEIR: Livssynsteam skal hindre radikalisering
Livssynsteam
– Kan du fortelje litt meir om det nye livssynsteamet?
– Vi har ei arbeidsgruppe som held på å lage eit opplegg for dette no, og vi veit frå andre europeiske land at samarbeid mellom ulike livssyn kan motverke radikalisering.
– Kven vil vere del av teamet?
– Dei vil vere frå ulike trusretningar. Det kan vere ein imam, ein prest, og så vidare. Detaljar får vi komme tilbake til noko seinare.
– Dette er ei intensivering av tidlegare tiltak, seier du. Men radikalisering har vore eit tema lenge. Burde ikkje dette vore gjort før?
– Radikalisering er ikkje ei ny problemstilling for oss. Det aller viktigaste er våre tilsette som er ute blant dei innsette. Samhandling og samtale er grunnleggande viktig i det arbeidet vi gjer.
Følg oss på Facebook og Twitter!
Teken for å vere 35
– Når gjorde du sist noko for første gong?
– Eg dykka med kvithaiar i Sør-Afrika i fjor. Det var kjempespennande!
– Kva er heilagt for deg?
– Dei grunnleggande verdiane i eit demokratisk samfunn.
– Kva ber du om tilgjeving for?
– Det kan vere så mangt. Viss eg har gjort noko som eg synest ein bør be om tilgjeving for, så gjer eg det. Men det er jo alltid betre å be om løyve enn tilgjeving.
– Kva er det raraste du har høyrt om deg sjølv?
– Førre veke var det nokon som tok meg for å vere 35!