Krev full retrett av Presteforeininga etter homo-standpunkt

«Eg oppmodar PF til å samla sentralstyret med ein gong. Det er berre full retrett som kan aksepterast», skriv Morland i sitt utmeldingsbrev til Presteforeininga (PF).

Motbør. Sentralstyret i fagforeininga som organiserer det store fleirtalet av prestar i Den norske kyrkja, har møtt kraftig motbør frå mange av medlemmane sine.

– Bispemøtet har teke føre seg ei læremessig avklaring som inneber at kyrkja anerkjenner homofilt samliv. Den naturlige slutninga av det er å opne for at likekjønna par kan bli via i kyrkja, har Presteforeininga sin leiar, Gunnar Mindestrømmen, sagt på vegne av sentralstyret.

Vårt Land har skrive om at blant anna to tidlegare PF-formenn og tre pensjonerte biskopar har meldt seg ut i protest mot dette utspelet.

No slår ein av dei siste tiårs mest toneangivande leiarar i Presteforeininga, Egil Morland, følgje med dei. Morland var med i sentralstyret i Presteforeininga i ti år frå 1988. Han var nestleiar i to år og leiar i fem år.

Til å gråta over. «PF kneset (elles) eit teologisk prinsipp som er til å gråta over. Det har aldri vore PF-policy, mellom anna fordi det er eit brot på luthersk lære, å visa til eit splitta bispemøte (eller bispemøte i det heile!) som grunngjeving for eige standpunkt», skriver Morland i brevet til Presteforeininga.

Morland er no førstelektor ved NLA Høgskolen i Bergen, og medlem i Kyrkjerådet og arbeidsutvalet i rådet.

Angrep. «No sitt eg i Kyrkjerådet og drøftar denne vanskelege saka. Eg kan ikkje med min beste vilje tolka vedtaket i Presteforeininga annleis enn som eit direkte angrep på det eg står for der», skriv Morland.

Han meiner «full retrett» frå sentralstyret er det einaste som no kan bli akseptert.