Flau Aasrud fekk kyrkjeleg takk for ministerjobben

Kranglar om kor mange kroner Den norske kyrkja bør få til trusopplæring og dragkampar etter kyrkjeforliket enda i går med blomar, ros og smil i Kirkens hus.

– Eg vil seie takk til kyrkjeminister Rigmor Aasrud for eit veldig godt samarbeid. Du har vore kyrkjeminister i ein veldig krevjande fase, sa direktør i Kyrkjerådet, Jens-Petter Johnsen.

LES MEIR: No blar Aasrud opp for kyrkja

– Det har også vore krevjande å stadig vere på møte med deg, for før vi er ferdig med halve innleiinga i ein sak så byrjar du å stille spørsmål, la Johnsen til i ein humoristisk tone.

– Eg blir litt flau når eg tenker på alle gongane vi ikkje har kome gjennom dagsorden på møta sidan eg spør så mykje, sa Aasrud til Vårt Land etter takkeseremonien som skjedde under utdelinga av Olavstipendet tirsdag.

– Men eg let meg lett rive med og synes det til stadigheit er noko å spørje om, ler Aasrud.

Aktiv i kyrkja. Johnsen roste også det ekte engasjementet i kyrkjesakene.

– Det har ikkje vore ein kyrkjeminister på langt tid som har reist så mykje rundt om kring og delteke på kyrkjelege arrangement slik som du har gjort, sa direktøren.

Den største saken under Aasruds statsrådsperiode har vore oppfølginga av kyrkjeforliket, som ga grunnlaget for avviklinga av statskyrkja.

LES MEIR: Aasrud: – Kyrkja har oppfylt demokratireforma

Krone-krangel. – De har krangla mykje om kva som er den rette summen kroner som Den norske kyrkja skal få til trusopplæring, Aasrud og Johnsen?

– Dersom alle til ei kvar tid var nøgd med dei løyvingane departementet ga i det politiske systemet vi har, så hadde det vore litt vel raust. Kyrkja har hatt sine forventningar, medan vi i departementet har hatt våre avvegingar. Det er berre slik det er, seier Aasrud.

– Vi veldig nøgd med at ministeren har stilt krevjande spørsmål ved kva trusopplæringa skal innehalde. Når det gjeld pengar har vi ikkje vore så nøgd sidan Aasrud seier at den endelege finansieringa er nådd. Men det får vi ta med den neste statsråden, smiler Johnsen.

Generalsekretær i Presteforeningen, Ole-Johs Huuse, roste også Aasrud under seansen.

– Vi har hatt eit veldig godt samarbeid. Aasrud har teke seg tid til å møte oss og sette seg inn i våre saker, sa Huuse.

[ LES FLEIRE SAKER OM TRUSOPPLÆRINGSREFORMA ]