Prest sto fram som homofil under preika

Det skjedde i byrjinga av januar. Irske Martin Dolan, som har vore katolsk prest i Dublin i 15 år, ga si støtte til homofile ekteskap frå preikestolen. Og avslørte at han sjølv er homofil. Det skriv den britiske avisa The Guardian.

Kyrkjelyden skal ha reagert med ståande applaus. Liz O'Connor, ein ungdomsarbeidar frå området, sa til avisa Irish Sun at dei er alle svært stolte av Dolan.

– Det at han har innrømma at han er homofil, endrar ikkje den personen vi kjenner, sa ho vidare.

LES OGSÅ: Truer med sparken hvis ansatte skriver homovennlig

Snart folkeavstemning

Snart vil det vise seg om O'Connor har mesteparten av sine landsmenn bak seg. I mai i år er det folkeavstemning, og homofile ekteskap kan bli lovleg i eit av dei mest konservative landa i Europa.

Folkeavstemninga blei bestemt av eit grunnlovsutval, som blei nedsett for å sjå på fleire tema i irsk politikk og samfunn, med tanke på å endre lova. I april i fjor stemte brorparten av utvalet for at den irske grunnlova bør endrast til å tillate ekteskap mellom menneske av same kjønn, ifølgje BBC.

Ei meiningsmåling gjort av avisa Irish Times i desember viser at 71 prosent av veljarane vil stemme for homofile ekteskap.

Følg oss på Facebook og Twitter!

Nei frå den katolske kyrkja

Til trass for den tilsynelatande store støtta blant folket, er den katolske kyrkja i Irland svært negative til folkeavstemninga. Biskopen i Kildare & Leighlin, Denis Nulty, seier til BBC at kyrkja er klar til å kjempe mot homofile ekteskap.

– Kyrkja ser på familien, med ekteskapet mellom ei kvinne og ein mann som basis, som den absolutt viktigaste institusjonen i alle samfunn, sa Nulty.

– Å endre på ekteskapet vil svekke denne fundamentale byggesteinen i vårt samfunn, meiner biskopen.

LES OGSÅ: Kirken holder på omdømmet

– Kristne vil kjempe på begge sider

Ei homofil, kristen gruppe var blant dei første til å ynskje avgjersla om folkeavstemninga velkomen. Richard O'Leary, som leier den irske kyrkja si gruppe Changing Attitude Ireland, sa til avisa The Guardian at kristne kjem til å kjempe på begge sider fram mot folkeavstemninga i mai.

– Sjølv om katolske biskopar har uttrykt motstand, kan kristne likevel bruke sin samvitsfridom til å stemme ja til homofile ekteskap. Akkurat som dei gjorde for 20 år sidan, då skilsmisse blei lovleg, sa O'Leary.

«Historisk steg»

Grupper som kjempar for rettane til homofile, som Amnesty International og Gay and Lesbian Equality Network, har på si side skrytt mykje av presten Martin Dolan, som nyleg sto fram som homofil. Leiar av sistnemnde organisasjon meiner folkeavstemninga er «eit historisk steg» mot likskap i Irland.

– Denne folkeavstemninga handlar ikkje berre om meg. Den handlar også om mine foreldre. Det er så viktig for mine foreldre at deira born blir behandla på same måte som alle andre sine born, seier ein homofil mann til Irish Times, som ikkje lenger bur i heimlandet.

Avisa intervjua mange som var heime på juleferie i desember.

LES OGSÅ: Katolsk toppmøte droppet honnørord om homofile

Partnarskap lovleg

Det er 20 år sidan homofili vart avkriminalisert i Irland. Likekjønna par har fått inngå partnarskap sidan 2011, men ikkje ekteskap. Til no har 1.500 irske par valt å gjere dette, ifølgje BBC.