Lysbakken svekker samlivshjelp

I statsbudsjettet har familieminister Audun Lysbakken gjort eit kraftig kutt i tilskotet til samlivskursa Hva med oss? og Godt samliv. Nær 5,9 millionar kroner er skorne vekk med budsjettkniven. Kring to av tre kroner til administrasjon og kurs vert fjerna med Lysbakkens raude makt frå samlivsbudsjettet, frå løyvinga i år på 9,2 millionar.

– Dette vil medføre klart redusert kurstilbod, forklarar avdelingsdirektør Kjetil Horgmo i Barne-, ungdoms- og familiedirektoratet (Bufdir) som må gjennomføre kuttet dersom budsjettet vert vedteke i Stortinget.

Strevsamt. Det skaper kraftige reaksjonar hos folk som har vore på kurs. Una Kvalø-Hamann og mannen Ingo frå Horten var på kurs medan den svært sjuke dottera Ive Wilhelmine levde. Då ho var eit halvt år gammal, fekk foreldra vite at ho hadde eit sjeldant syndrom, Aicardi. Ho fekk tiltakande epilepsi og tiltakande pustesvikt. Foreldra gjorde alt dei kunne for å vere til stades.

– I lange periodar budde vi på sjukehuset i Tønsberg. Det gjekk ut over familielivet, det gjekk ut over storesøster Ylva og det gjekk utover oss som par. Vi var opptekne av korleis vi kunne vere der for Ive og for Ylva som tidleg måtte leve med uvisse om tilstanden til søstera. Etterkvart lærte vi kor viktig det blei å kommunisere, seier Kvalø-Hamann.

Dei fekk tilbod om kurs som heldigvis ikkje vart halde meir enn vel ein haltime heimanfrå sidan dei ikkje kunne reise langt: Noko kunne skje med Ive når som helst. Det gjorde det også denne kurshelga. Ive måtte på sjukehus. Men foreldra klarte å gjennomføre kurset.

Døydde. – Kurset var viktig for å lære å snakke saman, få hjelp til å vere kjærastar og til å vere mamma og pappa. Vi fekk verktøy til å lære betre å handtere konfliktar, seier Una Kvalø-Hamann og legg til:

– Det vil vere svært trist om midlane til slike kurs vert kutta ned på. Desse kursa er ei investering i parforhold og familieliv som lever under sterke påkjenningar.

Ive Wilhelmine døydde for halvtanna år sidan.

– For oss ville det vore vel så viktig å komme på kurs no, og det vil vi gjerne. Etter at Ive døydde står vi der i sorga og skal ta til med livet heilt på nytt, seier Una Kvalø-Hamann.

– Ille. Even Tengesdal som leier familievernkontoret i Skien, seier at kuttet er ille.

– Foreldre med funksjonshemma er ei svak gruppe med sterke påkjenningar på samlivet, seier han.

Departementet skriv at nedgangen skuldast «redusert aktivitet» for kursopplegga Godt samliv, som Laila Dåvøy starta opp i si tid som minister, og Hva med oss?

Regionleiar Kristin Askevold i familievernet i sør seier det kan godt hende at dette stemmer for Godt samliv. Etter at øyremerkinga av kursmidlar vart putta inn i den kommunale ramma, er det mange kommunar som ikkje ser seg råd til desse kursa, som her i Skien, ifølgje henne.

– Men for Hva med oss? merkar vi aukande aktivitet. Vi i regionen vår har fem faste kurs, to oppfølgingskurs og eit kurs for menneske som er åleine med funksjonshemma barn. Vi har alt no mange påmelde til kursa neste år. Neste år skal vi dessutan ha to ekstrakurs, eitt av dei for par med kreftsjuke barn, seier Askevold.

Opp, ikkje ned. Avdelingsdirektør Horgmo seier at direktoratet har inntrykk av at aktiviteten i Godt samliv gjekk ned i 2009.

– Men for Hva med oss? var det derimot ein liten oppgang frå 2008 til 2009.

– Så det som står i statsbudsjettet er feil?

– Det eg kan seie er at det var ein liten auke i talet på kursdeltakarar, den viktigaste måten å måle aktivitet på.

– Er det avklart korleis kuttet i tilfelle skal gjennomførast?

– Så lenge budsjettet ikkje er vedteke, har vi berre hatt uformell kontakt med departementet. Vi arbeider med eit notat som skisserer ulike måtar å ta kuttet på, anten å kutte i begge tilboda, eller å bruke alle attverande midlar på eitt av tilboda. Det kan også vurderast eigendelar på kursa som i dag er gratis for slik å kunne halde oppe kurstilbodet, seier Horgmo.

Vil ikkje kommentera. Leiar av familiekomiteen på Stortinget, Gunn Karin Gjul (Ap), vart først gjort merksam på kuttet for få dagar sidan, og vil difor ikkje uttale seg om saka.

– Vi har ikkje kome så langt i budsjettarbeidet at det er naturleg å kommentere det, seier Gjul.

Barne-, likestillings- og inkluderingsminister Audun Lysbakken kunne søndag ikkje kommentere samlivskutta.