Katolikkar vil anke abortlov

Vatikanet var sterkt engasjert i kampen mot fri abort i Mexico City. Men motstandarane tapte då den lovgjevande forsamlinga i millionbyen med 46 mot 19 røyster fjerna straffa for dei som tek abort før 12 veker.

Det nasjonale handlingspartiet som stør den romersk-katolske kyrkja i kampen mot abortlova, har varsla at lova vil bli anka inn for Høgsteretten.

Håpar på retten

Ei kjelde i Vatikanet seier til den engelske avisa The Daily Telegraph at «det er framleis tid til å endre situasjonen, vi kan håpe på ei domsavgjerd».

Kyrkja har forbod mot å engasjere seg i politikk i Mexico. men den har vore aktiv i abortdiskusjonen og tydeleg mot den no vedtekne lova. Kardinal Norberto Rivera Carrera, som er erkebiskop i Mexico, har alt sagt at abortlova bryt med Grunnlova. Den katolske kyrkja har samla 70.000 underskrifter med krav om folkerøysting.

Det kjem ingen offisiell kommentar frå Vatikanet før den mexicanske episkopale bispekonferansen har hatt møte om nokre dagar.

Frykt

Vatikanet fryktar at fri abort dei 12 første vekene i Mexico City skal spreie seg til resten av landet og til Latin Amerika elles. Alle som utfører abort, risikerer å bli ekskommuniserte frå Den katolske kyrkja.

Meir enn ein halv million meksikanske kvinner søkjer illegalt abort kvart år.