Vigsla til biskop i Bodø, men fyrst gjekk han til skriftemål
DEN NORSKE KYRKJA: Sør-Hålogaland har fått ny biskop i ei feststemt gudsteneste. Men ikkje alle veit om tradisjonen der den komande biskopen kvelden før går til skriftemål.
SKRIFTEMÅL: Dagen før bispevigslinga i Bodø deltek den påtroppande biskopen og eit hundretals andre på skriftemålsgudsteneste i domkyrkja. Midt i biletet Svein Valle, til venstre fungerande domprost Dirk Torsvik Gieselmann.
Marit Neset
Om lag hundre menneske sit spreidd i benkeradene i Bodø domkyrkje laurdag kveld. Medan kyrkja i morgon skal vera fylt til randa av celebre gjester og festkledde menneske til bispevigsling, er stemninga ei anna i kveld.
– I dag er blikket retta mot det strevsame og det me treng tilgjeving for. I morgon rettar vi blikket i retning av å feire, glede oss, synge og kanskje danse.
Slik innleier prost i Indre Helgeland, Karianne Egeberg Gullfjell, skriftemålsgudstenesta.
