Den førstefødde mellom mange sysken

Utvald. Smak på det ordet. Kva smakar det av – for deg? Likar du det? Kven handlar det ordet om? Er du med i det? Har du lyst til å vere med i det?

Utvald. For meg går assosiasjonane fort i retning av overspent og usunn religiøsitet. Der mykje av energien går med til å oppretthalde ei sjølvforståing der ein sjølv er av dei utvalde, medan dei fleste andre ikkje er det. Dette er jo mykje av drivkrafta i sektprega religiøsitet.

Vårt Land gir meg stadig sjansen til å sjå og reflektere over fenomen som dette. Det kan kjennast framandt og skremmande – og av og til nesten litt eksotisk. Samtidig: Kven vil vel ikkje kjenne seg utvald? I alle fall litt?