No kjem Bibelen som podkast
PÅ ØYRET: Bibelen endra Daniel Sæbjørnsens liv. No har han lese inn heile Det nye testamente som podkast, slik at folk gratis og enkelt skal kunne høyre på Guds ord.
LYTTE: Daniel Sæbjørnsen i Tro og Medier håpar folk skal høyre på bibelvers medan dei pumpar jern eller sit på bussen.
Foto: Kjetil Fyllingen
– Eg gjekk gjennom ein periode med mykje angst. Livet var ikkje slik eg trudde det skulle bli. Eg las eit vers frå Jesaja 43.1: «Ver ikkje redd! For eg har løyst deg ut, eg har kalla deg ved namn, du er min». Det trefte meg midt i magen, og det markerte slutten på ei veldig krevjande reise i mitt liv. Dette og fleire andre opplevingar har gjort meg veldig entusiastisk for Bibelen og kva den kan bety for folk, seier Daniel Sæbjørnsen, kommunikator i den kristne medieorganisasjonen Tro & Medier.
Engasjementet for at fleire skal oppdage det same, gjorde at han kom med ideen om å gjera Bibelen til podkast. Han var også lei av at han berre kunne få andre sine tankar rundt Bibelen, men ikkje sjølve kjelda på øyret. Visst finst Bibelen som lydbok, men det blir ikkje like tilgjengeleg, meiner Sæbjørnsen. I alle fall ikkje for hans hovudmålgruppe.
– Det er få unge som abonnerer på Storytel. Men på Spotify, der er dei.
