Studie: Barn frå svært kristne heimar har betre sjansar for eit godt liv

Det er sosiologen Ilana Horwitz som står bak studien, som har følgt 2390 amerikanske tenåringar frå 2003 til 2012.

– Mi forsking viser at barn frå religiøse arbeidarheimar får høgare karakterar enn barn frå ikkje-religiøse arbeidarheimar. Dei er meir truande til å ta ei høgare utdanning, og endar derfor oftare opp i betre jobbar og med færre, sosiale problem, seier Horwitz, ifylgje Kristeligt Dagblad.

Ho er lektor i jødiske studiar og sosiologi ved Tulane universitet i USA. Nyleg gav ho ut boka «God, Grades and Graduation: Religions’s Surprising Impact on Academic Succes», basert på ein studie der ho tenåringane over ein tiårsperiode.

Barn som er oppdregne i religiøse heimar er ofte veldig pliktoppfyllande, gode til å samarbeide og meiner det er viktig å respektere autoritetar og fylge reglar.

—  Ilana Horwitz

Forskjell på gutar og jenter

Horwitz såg ein særskilt stor effekt av å koma frå ein sterkt truande, kristen familie hjå gutar frå middelklassa. For tenåringar med høgt utdanna foreldre, hadde den religiøse bakgrunnen lite å seie for karakterar og utdanning.

Det sama kan seiast for jenter, men med nokre unntak. I visse tilfelle kunne faktisk det å koma frå ein sterkt kristen heim tvert imot gje dei lågare sjanse til karriere.

Forklaringa til sosiologen er at det verka inn på ambisjonane deira til heller å handle om ting som familie og frivillig arbeid.

Pliktoppfyllande og respekt for autoritetar

– Religiøse gutar er ikkje smartare, så kvifor gjer dei det betre på skulen? Svaret ligg i korleis religiøs tru og praksis kan verne arbeidarklasse-amerikanarar, menn i sær, frå håpløyse, skriv Horwitz i eit innlegg hjå New York Times.

Ho har særskilt sett på barn som har vokse opp i protestantiske, katolske og mormonske heimar. Felles for desse er at dei fleste får det sosiologen kallar «sosial kapital», som mellom anna inneber at dei veks opp i store og sterke fellesskap, med synlege førebilete og ein sterkt forankra moral.

– Barn som er oppdregne i religiøse heimar er ofte veldig pliktoppfyllande, gode til å samarbeide og meiner det er viktig å respektere autoritetar og fylgje reglar. Det er tilfeldigvis kvalitetar som er høgt verdsette i det amerikanske utdanningssystemet, seier Horwitz.

Vanlegvis finn ein sosial kapital hjå familiar med høg utdanning og inntekt. Dei er ofte veldig involverte i oppdraginga av barna sine, og sørgjer for at dei har sterke nettverk og kan delta i sivilsamfunnet.

Foreldre frå lågare middelklasse har som regel mindre høve til å delta like aktivt i oppdraginga, og barna får som konsekvens lågare kapital. Men unntaket er ifylgje den amerikanske sosiologen altså barn som veks opp i sterkt religiøse familiar, skriv Kristeligt Dagblad.

[ Eit relikvie verdt 350 millionar kroner var truleg om bord då det russiske krigsskipet gjekk ned ]