Ber om å få tre av som erkebiskop

Marx er ikkje mistenkt sjølv, men meiner at alle i kyrkjeleinga er medansvarlege. No etterspør den kjende kardinalen reformar.

«Denne krisa har oppstått også på grunn av våre eigne feil, av vår eiga skuld». «Eg ber deg om å godta min avgang som biskop i München og Freising». Det skriv den tyske kardinalen Reinhard Marx i eit brev til pave Frans. Heile brevet er publisert på fleire språk på bispedømet sine nettsider.

Marx trekkjer fram kyrkja si manglande evne til å forhindre nye, seksuelle overgrep som årsaka til at han ber om å få trekkje seg. Han seier dette er ein måte for han å vise at han er villig til å ta ansvar for «katastrofen ved det seksuelle misbruket som er gjort av kyrkjas tenestemenn dei siste tiåra».

[ Tyskland: – Biskopen hadde hemmelig arkiv med overgrepsanklager ]

– Går ein blindveg

Hausten 2018 kom det ein rapport om seksuelle overgrep i den katolske kyrkja i Tyskland. Ifylgje denne blei drygt 3500 born og unge mishandla mellom 1946 og 2014. Meir enn halvparten av ofra var 13 år eller yngre.

Og i år kom ein ny rapport om korleis erkebispedømmet Köln, som er det største katolske bispedømet i Tyskland med 1,9 millionar medlemmar, handterte problemet. Rapporten rysta Tyskland, og fleire biskopar trakk seg frå embeta sine som ein konsekvens av det som kom fram.

Marx seier han har inntrykk av at ein i den katolske kyrkja har gått ein blindveg, men at han håpar at ein heller kan la det bli eit vendepunkt enn eit endestopp. Han ynskjer at brevet hans skal sende eit signal og han håpar den katolske kyrkja skal vakne, ikkje berre i Tyskland, men i heile verda.

[ Hun skal forebygge overgrep i Den katolske kirke: – Man må snakke om lidelsen disse ofrene er påført ]

– Feil person som dreg

Vatikanet har foreløpig ikkje kommentert innhaldet i brevet, men det blir møtt med både ros og kritikk frå andre hald. Det skriv den svenske avisa Dagen.

«Den katolske kyrkja har verkeleg nådd vegs ende, viss ein med det meiner den liberale vegen til kardinal Marx», skriv spaltist Rod Dreher i The American Conservative.

Dreher legg til: «Han har rett til å trekkje seg. Lat nokon som kan tilby ekte leiing basert på sanning ta over».

Men Thomas Sternberg, leiar av sentralkomiteen for dei tyske katolikkane, ZdK, som representerer alle dei store katolske organisasjonane i landet, er ikkje einig, ifylgje Dagen.

[ Skammens skoler i Canada - en mørk del av landets og kirkas historie ]

- Det er feil person som dreg, meiner Sternberg som seier Marx har handtert avsløringane om seksuelle overgrep på ein god og viktig måte.

Marx etterlyser reform og fornying i den katolske kyrkja, og er kritisk til dei kreftene i kyrkja som han meiner ikkje er villige til å ta ansvar og som dermed motset seg endring. Han er redd for at spørsmålet om seksuelle overgrep berre blir handsama på ein administrativ måte, og at dette ikkje er nok for å løyse problema kyrkja har.

Paven har kunngjort at kardinal Marx kan halde fram med sine plikter som erkebiskop fram til avgjersla om hans eventuelle avgang er teken.

[ Under denne feiringen er det Jesu kropp og blod som er i sentrum ]