Styret i Norges kristne råd (NKR) har behandla Brunstad Christian Church (BCC), også kjent som Smiths venner, sin søknad om medlemskap. Basert på høyringssvar frå medlemsorganisasjonane anbefaler dei at trussamfunnet skal halde fram med observatørstatus, heller enn å bli teken opp som medlem.
Den endelege avgjersla er det NKR sitt rådsmøte som tek i midten av september i år.
– Vedtaket er basert på høyringssvara. Me har hatt gode samtaler med BCC i tre år, og me opplever at dei har bidratt med mykje positivt inn i vårt fellesskap, men det er ein del spørsmål som krev avklaring. Derfor anbefaler me å vidareføre observatørstatusen deira, slik at me får sjansen til å bli endå betre kjent, seier Erhard Hermansen, generalsekretær i NKR.
Styreleder og informasjonsansvarlig i BCC, Berit Hustad Nilsen, seier dei er informerte om vedtaket, og at dei har planlagt eit møte med NKR der dei skal få vita meir om bakgrunnen for avgjersla.
– Eg ynskjer ikkje å uttale meg meir før me har hatt ein dialog med NKR, slik at me kan forstå årsakane til at dei har kome fram til denne anbefalinga, seier Nilsen.
[ Den norske kirke sier nei - vil ikke ha Smiths venner med i Norges Kristne Råd ]
Samla styre bak vedtaket
NKR er ein økumenisk paraplyorganisasjon for kristne kyrkjer og trussamfunn. I år har dei motteke tre søknadar om medlemskap frå Den Islandske kyrkjelyden i Norge, Kristent nettverk og BCC.
På styremøtet 19. mai vedtok styret å anbefale at dei to sistnemnde ikkje blir tatt opp som medlemmar, medan Den norske kyrkjas systerkyrkje på Island får grønt ljos.
– Var det usemje og diskusjon rundt vedtaket om BCC sitt medlemskap?
– I høyringssvara landa ikkje alle på eit tydeleg ja eller nei, men det kom fram ei rekke spørsmål som krev avklaring. Me jobbar stort sett med ein konsensusmodell, så eit samla styre står bak avgjersla, seier Hermansen.
[ Pinsebevegelsens første kvinnelige pastor: – Kristne homofile møter et hav av stengte dører ]
Spørsmål som treng svar
På spørsmål om kva det er styret gjerne vil ha avklart trekkjer Hermansen mellom anna fram om det er noko i det som har kome fram i media om samanblanding av privat økonomi og kyrkjeliv, og også forholdet kyrkjesamfunnet har til tidlegare medlemmar og til andre kyrkjesamfunn.
I fjor retta mellom anna NRK eit kritisk søkelys mot BCC med dokumentaren «Guds utvalde». Ein stor del av dokumentaren handlar om forholdet mellom leiarane sin private økonomi og kyrkjelydens. BCC meinte då at dei ikkje hadde fått sjanse til å bli høyrt i saka.
Hermansen nemner også ein av tinga som kom fram i Den norske kyrkjas høringssvar, nemleg at ein etterspør dokumentasjon på eit økumenisk engasjement hjå BCC.
---
Brunstad Christian Church (BCC)
- Brunstad Christian Church, tidlegare kalla Den kristelige menighet, oppstod i Vestfold på byrjinga av 1900-tallet.
- Fekk sitt uoffisielle namn, Smiths Venner, etter stiftaren Johan Oscar Smith.
- I dag har trussamfunnet omlag 8.400 medlemmar i Noreg.
- Har søkt om medlemskap i Norges Kristne Råd.
---
Ynskjer dialog
– Skjer det ofte at rådsmøtet i NKR landar på ein annan konklusjon enn styret si anbefaling i medlemsspørsmål?
– Det kan eg ikkje svara på, då eg berre har vore generalsekretær under eitt rådsmøte, og då var det ingen søknadar om medlemskap som blei behandla, svarar Hermansen.
Han legg vekt på at dei i tida fram mot rådsmøtet i september vil ha ein god dialog med søkarane.
[ Slik svarer frikirkene på Hegertuns oppfordring ]
Grunnen til at styret heller ikkje vil anbefale at Kristent nettverk blir tatt opp som medlem opplyser generalsekretæren at handlar om at dei er ei stifting og ikkje ei kyrkje eller eit trussamfunn, slik som NKR sine vedtekter seier at skal ligge til grunn for medlemskap.
At dei tilrår å godta Den Islandske Menighet i Norge sin søknad om medlemskap handlar mellom anna om deira solide økumeniske erfaring, opplyser Hermansen.
