Barn diktar nattahistoriar for vaksne for å muntre dei opp under korona

Kvar kveld gjennom fasta blir det lagt ut ein ny video med ei eigendikta nattaforteljing på kyrkjelyden St. Anselm’s nettside. Det er barn i alderen 3-14 år frå kyrkjelyden som ligg i London som både har funne på og lese inn historiene.

Sjå video nedst i saka.

Southwark News skriv at det er barne- og ungdomspresten, Suzette Aagaard, som hadde ideen.

– Me er eit varmt og støttande fellesskap her i St. Anselm’s, og det å ikkje sjå kvarandre kvar sundag har byrja å tære på mange av kyrkjelydsmedlemmane.

[ Trur mange 50-åringar synest det er deileg å sleppe å gå på gudsteneste ]

Eit smil på slutten av ein lang dag

– Sidan me er velsigna med fantastisk fantasirike unge menneske her, tenkte eg at det var ein herleg idé at barna kunne lesa ein nattahistorie for dei vaksne for å muntre dei opp, seier Aagaard til Southwark News.

Alle filmane finn du på heimesida til kyrkjelyden. Her finn du historier om sumpmonster, skjelpadder og hattar som har forsvunne.

Til Church Times seier Julie Minns frå St. Anselm at Aagaard har kome opp med mange gode idear for å skape samhald, både digitalt og utandørs.

– Men familiane saknar å samlast i barnegruppa i kyrkja, og folk byrjar å bli slitne og leie. Derfor er det så fint å ha noko slik som nattahistoriene. Noko som får deg til å smile på slutten av ein lang dag, seier Minns.

Her er ein av nattahistoriene som er lagt ut til no:

[ «Skyt meg i staden» tryglar nonna. No går videoen av den modige kvinna verda rundt ]