På eit møte i Hægebostad kyrkjelege fellesråd onsdag kveld vedtok ein å ikkje utlyse organiststillinga som står vakant i Hægebostad kirke og Eiken kyrkje. Vedtaket gjeld for perioden 01. mars til 31. august. Det opplyser kyrkjeverje i Lyngdal og Hægebostad, Carl Magnus Salvesen.
– Kva er årsaken til det?
– Økonomien.
– Korleis er den for tida?
– Veldig dårleg.
Stenger kyrkjer
Årsaken til det ynskjer ikkje Salvesen å gå nærmare inn på, men Fædrelandsvennen skriv at det er foreslege å stenge nettopp kyrkjene i Hægebostad og Eiken fram til april for å spare straumutgifter.
– Korleis skal de dekke behovet framover?
– Ved hjelp av vikarar.
– Det blir billigare?
– Definitivt.
Blei innstilt på andre plass
– Nokon vil kanskje seie at dette er mistenkeleg timing, gitt dei siste dagars medieoppslag om Rune Hauan?
Det blir stille i andre enden.
– Kva tenkjer du om det?
– Det tenkjer eg ingenting om.
– Det eg kan seie at Rune Hauan søkte stilling hjå oss i 2020, og han blei innstilt på andre plass. Det vil seie at hadde søkaren som fyrst fekk tilbod om stillinga sagt nei, hadde Hauan fått den.
– Og kva vil det seie?
– Det snakkar 100 prosent for seg sjølv.
Vil ikkje kommentere
– Betyr det at viss stillinga blei lyst ut no og Hauan var best kvalifisert så ville de ikkje hatt problem med å tilsetje han?
– Eg driv ikkje med arbeidsgiveri i media, det reknar eg med at du forstår.
Vårt Land har vore i kontakt med organist Rune Hauan. Han vil ikkje kommentere saka.
[ Fikk ikke spillejobb i menighet fordi han hadde mannlig samboer. Nå vurderer han å søke jobb der ]