«Eit gledeleg etterslep» kallar kyrkjerådsdirektør Ingrid Vad Nilsen situasjonen rundt barnedåp i Kyrkje-Noreg no.
– Det er veldig, veldig positivt at folk kjem tilbake til kyrkja. At etterspurnaden er større enn vanleg, er heilt openbert, seier ho.
Sjølv om direktøren ikkje sit på oppdaterte tal på kor mange dåpsfamiliar som står i kø, fortel ho at auka pågang er ei oppleving kyrkjer i heile landet rapporterer om i desse dagar.
Til Kyrkjerådet fortalde Vad Nilsen torsdag at ho har høyrt personar ute i kyrkjene uttrykke at det «ikkje er plass til fleire dåpar før etter nyttår».
– Kva seier du til det?
– Då kjem eg, seier Vad Nilsen, som også er ordinert prest.
[ Rekordmange ungdommer blir døpt i Den norske kirke ]
Oppmodar til overtid
Å få døypt barn må stå høgt på prioriteringslista i Den norske kyrkja no, meiner Vad Nilsen.
– Det er det viktigaste vi gjer, og det legg vi no til rette for så godt vi kan.
– Har kyrkja nok ressursar til det?
– Dette er noko vi må ha ressursar til – og vi har jo dei ressursane vi har. Då må vi prioritere, seier direktøren.
Mange foreldre ønsker éi dåpsgudsteneste kvar, slik ein har praktisert under pandemien. Og når barn frå to månadar til to år står i kø, blir det mange å handtere.
Vad Nilsen anerkjenner innsatsen og den store mengda arbeid som ligg på dei kyrkjetilsette i ein slik situasjon.
Der oppmodar direktøren til å bruke eit middel som kan anerkjenne den ekstra innsatsen:
– Frå vår side seier vi: Er det nokon gong ein skal vurdere å bruke overtid, er det no når det er veldig mange dåpsgudstenester og konfirmasjonar.
Må gripe sjansen
– Kyrkja har mange slitne medarbeidarar no, samtidig som vi står midt i ein unntakstilstand. Enkelte er redde for kor lenge denne unntakstilstanden skal vare, og dei fleste gler seg til samfunnet opnar att, sa prest Kjersti Gautestad Norheim til Kyrkjerådet.
No må ein få lov til å trekke pusten litt, utdjupar ho til Vårt Land. Men ikkje for lenge.
– Vi skal ta vare på kvarandre oppi dette. Men vi som kyrkje må vere på plass når opninga skjer.
Trass trykket, kallar Gautestad Norheim tida kyrkja går i møte for eit «moglegheitsrom».
– Det er viktig at vi no signaliserer at «her er vi», og kan ønske folk velkommen den augneblinken ting opnar.
– Mange har kjent på saknet av fellesskapet, av å synge salmar høgt eller å sitte i benken i bunad for å feire dåp. Då må kyrkja vere klar og ta imot alle som ønsker det.
Tydelege prioriteringar
I dåpssamtalar har ho blitt møtt av foreldre som unnskylder at dei kjem med store barn.
– Eg tenker kyrkja no må bruke all vår energi på å heller kunne seie «velkommen til dåp», seier Gautestad Norheim.
Men energien og ressursane er avgrensa.
– Då er det kanskje nokre innankyrkjelege ting vi må seie at skal vente. Vi må vere tydelege på kva vi tar fatt i og kva vi kan skyve på.
– Det er ikkje ved dei som vil kome til dåp og vigslar og gudsteneste at vi skal avgrense, seier Birkeland-presten.
Eit økonomisk signal
– Mange prestar melder at dei jobbar mykje no. No som landet opnar opp, er eg glad for at kollegaene er på tilbodssida, seier leiaren i Presteforeningen, Martin Enstad.
Men ved slike arbeids-toppar er det viktig at arbeidsgjevar sett pris på innsatsen til medarbeidarane, held han fram.
– Det er positivt at direktøren peiker på overtidsbetaling som eitt av tiltaka. Det er ei konkret anerkjenning av den ekstra innsatsen som skjer i heile landet no, seier fagforeiningsleiaren.
[ Etterlyser læresamtale om dåp mellom baptister og lutheranere ]
