Fredag morgon blei det klart kven biskopane i Den norske kyrkja, og bispedømerådet i Sør-Hålogaland ynskjer seg som arvtakar etter Ann-Helen Fjeldstad Jusnes.
Dei tre aktuelle kandidatane til å bli biskop i Sør-Hålogaland er Anne Skoglund, Svein Valle og Hallgeir Elstad.
Og det er sistnemnde flest biskopar ynskjer seg som ny kollega.
---
Slik stemte biskopane:
- Hallgeir Elstad fekk 4 fyrstestemmer, 1 andrestemme og 5 tredjestemmer.
- Svein Valle fekk 3 fyrstestemmer, 6 andrestemmer og 1 tredjestemme.
- Anne Bergljot Skoglund fekk 3 fyrstestemmer, 3 andrestemmer og 4 tredjestemmer.
---
Biskopane grunngjev si prioritering av kandidatane, men denne er ikkje offentleg.
Det har ikkje komme stemmer frå biskopar i Sør-Hålogaland og Nord-Hålogaland. Den norske kyrkja opplyser at Olav Øygard, biskop i det nordlegaste bispedømet, er inhabil i saka, sidan kandidat Anne Skoglund er stiftsdirektør i Nord-Hålogaland, der han er biskop.
Og sidan fungerande biskop i Sør-Hålogaland, Svein Valle, er ein av bispekandidatane, har det heller ikkje komme ei stemme herifrå.
Ikkje einige
Bispedømerådet har ein annan favoritt enn biskopane. Dei ynskjer seg domprost i Bodø, Svein Valle, som ny biskop.
Valle har også fungert som biskop i periodar, sidan Jusnes har vore sjukmeldt og gjekk av før ny biskop var på plass.
---
Slik stemte bispedømerådet:
- Svein Valle
- Anne Bergljot Skoglund
- Hallgeir Elstad
---
Sør-Hålogaland bispedøme dekkjer heile Nordland fylke, og Bodø domkyrkje er bispesete.
Den nye biskopen blir tilsett på Kyrkjerådet sitt møte i Bodø 21.–22. september.
---
Bispenominasjon i Den norske kyrkja
- Alle kan foreslå kandidatar til ny biskop.
- Bispedømerådet nominerer fem kandidatar.
- Kyrkjerådet gjev ein frist for å stille supplerande kandidatar.
- Dei nominerte kandidatane blir presentert.
- Alle som har stemmerett stemmer.
- Det blir gjort offentleg kva tre kandidatar som har fått flest stemmer.
- Biskopar og bispedømeråd uttalar seg.
- Kyrkjerådet tilset ny biskop.
---
[ Outsider-kandidaten ble bispefavoritt: – Bringer inn akademisk kompetanse ]