No må truleg desse lappane opp igjen i kyrkjebenkane

Det er mykje som er uklart om reglane regjeringa innfører frå midnatt torsdag. «Vi har foreløpig ikke utarbeidet nye råd for hvordan arrangementer skal gjennomføres», skriv FHI i ein e-post til Vårt Land. Det er derfor foreløpig ikkje kjend om det i praksis vil bli nokon konsekvensar for kyrkjegjengarane.

Det er berre drygt to månadar sidan lappane med plassnummer blei plukka ned frå benkeradene i Fagerborg kyrkje i Oslo. mest sannsynleg må lappane no opp igjen.

På regjeringa sin pressekonferanse i ettermiddag vart det gjort klart at det bli innført eigne tiltak i Oslo og nærliggande kommunar. Eitt av desse tiltaka er at det blir gjort avgrensingar på kor mange som kan vere på innandørs arrangement utan faste tilviste plassar.

Derfor må kyrkjene i hovudstadsområdet truleg igjen markere faste plassar med nummerlappar, slik dei gjorde før gjenopninga i september.

600 på ikkje tilviste plassar

Regelen som er innført er at det blir sett ei øvre grense på 600 personar på innandørs arrangement utan faste, tilviste plassar, med inndeling i kohortar på inntil 200 personar.

I februar i år gjekk den dåverande regjeringa over frå å snakke om fastmonterte sete til faste, tilviste plassar. Kyrkjebenkar og lause stolar fall utanfor den første kategorien, men med den nye kategoriseringa reknast altså kyrkjer no inn blant lokale som har faste plassar, til liks med til dømes kinoar. Regelen om faste tilviste plasser gjaldt uavhengig av sitteunderlag.

Godt samarbeid

Vårt Land skreiv tidlegare i veka om ei juridisk utgreiing av tidlegare koronarestriksjonar som fleire trus- og livssynsorganisasjonar står bak. Konklusjonen der var at det i byrjinga av pandemien vart gjort inngrep i religionsfridomen i Noreg. Men no er samarbeidet mykje betre, seier leiar for Samarbeidrådet for tru og livssynssamfunn (STL) Ingrid Rosendorf Joys til Vårt Land.

– Vi fekk etter kvart på plass eit ganske godt samarbeid med styresmaktene. Vi blei til dømes kontakta for å gje innspel i samband med innføringa av koronapass, seier ho.

Ho er lite bekymra for dei tiltaka som er innført til no, og trur dei vil ha lite innverknad på trussamfunna, med atterhald for at det enno ikkje er heilt klart korleis restriksjonane skal gjennomførast.

Behov for ei tilgjengeleg kyrkje

På fredag morgon sende Den norske kyrkja (DNK) ut ein e-post til prestar, prostar, stiftsdirektørar og kyrkjeverjer i heile landet med informasjon om dei nye, nasjonale tilrådingane, og om dei ekstra strenge tiltaka i Osloområdet.

«I ei tid der einsemd og usikkerheit er utbreitt, er det behov for ei synleg og tilgjengeleg kyrkje», skriv dei, og oppmodar derfor kyrkjelydane til å gjennomføre planlagt aktivitet, men sørgje for godt smittevern i tråd med lokale, regionale og nasjonale reglar og tilrådingar.

I Oslo har mellom anna arrangøren plikt til å registrere deltakarar med namn og telefonnummer, og ein må bruke munnbind der det ikkje er mogleg å halde minst éin meter avstand.