Saka nådde aldri rettssalen i Sør-Rogaland tingrett. Torsdag inngjekk Mette Boye og Strand kyrkjelege fellesråd eit rettsforlik.
«Ein er einige om å skilje lag, og saka er med dette løyst i minnelegheit» heiter det i ei felles utsegn sendt ut av Boyes advokat Ingebjørg Voster.
Partane på begge sider har blitt einige om å ikkje uttale seg utover det som står i den korte pressemeldinga.
Ifølge forliksdokumentet blir arbeidsforholdet til Mette Boye avslutta allereie 10. oktober.
[ Jørpeland var blant Rogalands best besøkte kyrkjelydar. Så skjedde det noko ]
Avblåst rettssak
Etter planen skulle diakonimedarbeidar i Jørpeland kyrkje, Mette Boye, og fellesrådet i Strand møtast i Sør-Rogaland tingrett i desember.
Ifølge lokalavisa Strandbuen kravde Boye erstatning for økonomisk tap, og dessutan oppreising frå arbeidsgivaren sin.
Advokaten til fellesrådet, Alexander Aas i KA, sa følgande til Strandbuen då saka blei kjend:
– Boye har fremja søksmål med krav om erstatning for økonomisk tap og oppreising. Arbeidsgivar meiner det ikkje er grunnlag for kravet, og stiller seg derfor uforståande til søksmålet.
I løysinga som er signert av alle partene i konflikten ligg det at fellesrådet må betale fem månadars løn til Boye etter at ho fråtrer stillinga.
I tillegg skal eks-arbeidsgivaren betale Boyes erstatningskrav og advokatkostnadar på 170.000 kroner.
[ Mette Boye vil gjere det normalt å løfte armane mot Gud: – Ikkje meir åndeleg enn å gå på do ]
