Sverige og Danmark har TV-gudstenester kvar sundag: – Også eit samfunnsansvar hos NRK

Nesten kvar sundag føremiddag riggar medieveteran Ragnar Sjøli seg til framfor TV-en. Klokka 10.00 slår han på den svenske rikskringkastaren, for på SVT2 er det alltid ei gudsteneste å sjå på.

– Det er uproblematisk å sjå ei gudsteneste med svensk språk. Men det er litt ergerleg at ikkje NRK kan prestere å kome med eit slikt tilbod, seier Sjølie.

Etter sundagens sending skreiv Sjølie ei oppmoding til den norske kringkastingssjefen på Facebook: «Altså, Thor Gjermund Eriksen: «Look to Sweden».

– Dette er spesielt aktuelt no som kyrkjer kan vere stengde i lengre periodar framover, men ønsket står seg også utanom koronatida, seier Sjølie.

[ Biskop Veiteberg: «Eg har høyrt fleire gode preiker dei siste åra. Og eg kan ikkje tru at dei berre er positive unnatak» ]

Variert – og til heile landet

For mange i landlege strøk er vegen til kyrkja lang. Under normale omstende går Sjølie på gudsteneste som vanleg, men meiner det er eit samfunnsansvar for NRK å formidle eit kyrkjeleg tilbod til alle.

– NRK burde sjå på dette som ein del av allmennkringkastaroppdraget – å gi høve for alle til å få feire gudsteneste, både under pandemien og etterpå, seier han.

Noko av det Sjølie set mest pris på med SVT-sendingane, er den store variasjonen.

– Det kjem like gjerne ei gudsteneste frå ei lita frikyrkjeleg forsamling, som frå ei av dei store kyrkjene. Heile kyrkjelandskapet blir sett, og det er ein økumenisk variasjon som eg synest er veldig bra.

Sjølie understreker NRK sine tilbod om radiogudsteneste og morgonandaktar. Likevel meiner han gudstenester på TV burde vere på sin plass. På Facebook fekk han støtte.

– Svakt av NRK

«Dette har irritert meg lenge», seier Egil Stray Nordberg. Han har jobba i NRK halvparten av yrkeslivet, og har i årevis ønskt det same som Sjøli. Nordberg har fleire gonger kontakta NRK om TV-gudstenester, men utan å få eit svar han er nøgd med.

– Det er ganske svakt av NRK å ikkje kunne følge eksempla til nabolanda våre, seier han.

Nordberg synest SVT har valt ein lur modell: Produksjonen er enkel, og gjort i opptak på 45 minutt. Ofte speler dei inn fleire gudstenester frå same møtesal eller kyrkje.

Når NRK sender gudstenester, derimot, er det ein stor produksjon . Det er ressurskrevjande. Nordberg synest NRK kan koste på seg å prioritere meir til livssyn.

– NRK må stikke fingeren i jorda og sjå kor enkelt og rimeleg det kan vere. Slik me har sett i pandemien, er det mange kyrkjelydar som lagar gudstenester gode nok til å kunne gå på TV, på begrensa ressursar.

---

NRK-plakaten

• I allmennkringkastaren sitt oppdrag heiter det mellom anna at NRK skal:
• «gjenspeile Norges religiøse arv og mangfold av livssyn og religion i det norske samfunnet» (§ 18)
• «formidle kulturarven i Norge» (§ 37)

---

Få ser gudsteneste på TV

Den svenske modellen med å «boks-produsere» TV-sendingar blir ikkje aktuell for NRK, svarar programsjef Kristian Karlsen. Han peiker på at NRK oppfyller samfunnsoppdraget med innhald om religion og livssyn på alle kringastarens plattformar – i radioprogram, nettartiklar og på TV.

– Me ønsker å vere til stades der det skjer uti kyrkjelydane, i heile Norge. Det er me på radio kvar sundag, seier programsjefen.

Om lag 300.000 høyrer på radiogudstenestane i NRK P1. Men vedd høgtigdsgudstenestene på TV er det annleis. Jula har gode sjåartal, mens i andre høgtider kan sjåartala vere nedi 25.000.

– Derfor er det viktig å formidle stoffet der publikumet vårt er. NRK dekker livssynsfeltet breitt, i forskjellige program og medium, fortel Karlsen.

[ NRK Super med religionsserie for barn: – Det skal ikke være flaut å si at man tror på noe ]