Pandemien har isolert oss alle. Men Norges biskopar er uroa for spesielt éi gruppe dei meiner lider enno verre: Lengeverande asyløskarar og ureturnerbare.
– Me synest det er ei skam for det norske samfunnet at det lever menneske i landet som ikkje får tjene til sitt eige livsopphald, og som får forsvinnande lite støtte, seier Stavanger-biskop Anne Lise Ådnøy.
Saman med Bispemøtet meiner ho det hastar for norske styresmakter å hjelpe dei som ikkje kan sendast tilbake til heimlanda sine, og som ikkje får nok til å leve av i Norge.
Derfor har dei sendt eit brev til regjeringa, og spør: «Hvordan vil regjeringen sørge for at grunnleggende rettigheter disse menneskene kan bli ivaretatt?»
– Det blir enno meir prekært i koronaperioden. Mange i dei frivillige støtteapparata må ta omsyn til si eiga helse – og denne gruppa står utan hjelp, seier Ådnøy.
[ Disse papirløse bruker superlim for å redde tennene ]
Meiner det hastar
For eitt år sidan lova regjeringa at ureturnerbare asylsøkarar, med samla alder og opphaldstid i Norge på minst 65 år (opphaldstid: 16 år), skulle kunne få opphald i Norge. Framleis sit fleire på asylmottak, ser biskopane, og etterlyser kor løysinga blir av.
Dette er hjartesaka til Stavanger-biskopen. Saman med biskopkollegane håpar ho brevet kan føre til to ting. Førsteprioritet:
– At det blir tatt affære for dei som allereie er lova eit betre liv, seier Anne Lise Ådnøy.
Prioitet nummer to:
– Å få utvida gruppa som er omfatta av løysinga, med tanke på alder og opphaldstid, og gitt dei høve til å ha si eiga inntekt. Utan at Arne Viste eller Gunnar Stålsett må gå i fengsel for det, seier ho.
Me synest det er ei skam for det norske samfunnet at det lever menneske i landet som ikkje får tjene til sitt eige livsopphald
— Anne Lise Ådnøy
---
Ureturnerbare:
- Rundt 3.000 personer har status som ureturnerbare asylsøkarar i Norge.
- I januar 2019 blei Høgre, Frp, Venstre og KrF einige om at regjeringa skal «legge til rette for en engangsløsning for eldre ureturnerbare asylsøkere som har bodd lengre enn 16 år i Norge».
- I desember 2019 blei løysinga presentert: «Ureturnerbare asylsøkere, som har samlet alder og oppholdstid i Norge på minst 65 år kan få opphold i Norge. Oppholdstiden må være minst 16 år».
- I februar blei forslag til endringar av utlendingsforskrifta sendt på høyring.
- Forskrifta er enno ikkje på plass.
---
[ Mikael Bruun: – Jeg angrer veldig på at jeg stilte i Dagsnytt 18 ]
Korona har forseinka arbeidet
Etter det Stavanger-biskopen er kjent med, har ikkje Bispemøtet fått svar på brevet til regjeringa enno.
I ein epost til Vårt Land skriv statssekretær Hilde Barstad (H) i Justis- og beredskapsdepartementet at:
– Departementet arbeider med saka. Ho var på høyring våren 2020, men er dessverre blitt forseinka av covid-19-pandemien.
Barstad fortel at det er sett av pengar i statsbudsjettet for 2021 til å følge dette opp.
– Me jobbar for at dette skal kome på plass raskt, skriv statssekretæren.
[ I undervisningen ble Bent Høie fortalt at homofili var syndig ]