Vedum: Eg støttar bondeopprøret
OPPRØR: Trygve Slagsvold Vedum gjev støtte til det pågåande bondeopprøret. – Dei er yrkesbrør, seier Sp-leiaren.
OPNAR MUNNEN: Trygve Slagsvold Vedum er blitt skulda for å vera taus om bondeopprøret. No kjem han ut med støtte til opprørarane, men ber dei gå vegen via bøndenes faglag.
Erlend Berge
I helga samlast Senterpartiet til landsmøte på Lillehammer. Partiet vart stifta i 1920 under namnet Bondepartiet, og har historisk hatt tette band til bondeorganisasjonane.
På utkanten av desse organisasjonane har det vekse fram eit bondeopprør, som har samla nesten 60.000 underskrifter til eit opprop og skapa stort engasjement på sosiale medium.
Den erfarne kommentatoren Thomas Vermes i ABC Nyheter har etterlyst stemma til Trygve Slagsvold Vedum i debatten. Han meiner Sp-leiaren har vore taus om saka.
