Støre skal diskutere Ukraina-krisa med Macron

– Eg ser fram til å møte president Macron, seier Støre.

Fredag skal han for første gong som statsminister møte den franske presidenten. Det skjer på toppmøtet «One Ocean» i Brest nordvest i Frankrike der også ei rekkje andre stats- og regjeringssjefar frå ulike verdshjørne deltek.

Skytteldiplomati

Det skjer i ei tid der spenninga aukar mellom Vesten og Russland som følgje av den russiske styrkeoppbygginga på grensa mot Ukraina.

Macron har den siste veka drive skytteldiplomati mellom dei to landa i håp om å stabilisere situasjonen. Måndag var han i Moskva for å snakke ansikt til ansikt med Russlands president Vladimir Putin, og deretter reiste han til Kiev for samtalar med Ukrainas president Volodymyr Zelenskyj.

– Presidenten har akkurat vore på reise i Moskva og Kiev, og vi vil diskutere den svært alvorlege situasjonen i og rundt Ukraina. Vi har eit felles sterkt ønske om at denne konflikten kan løysast på fredeleg vis, seier Støre, som også skal besøkje marinebasen i Brest.

Vanskeleg klimatoll

Forutan tryggingssituasjonen i Europa blir òg klima eit viktig tema når dei to statsleiarane møtest fredag.

– Det er tette band mellom Frankrike og Noreg. Vi vil òg snakke om EUs grøne giv og korleis dei to landa våre kan bidra til å nå klimamåla og utvikle ny, grøn industri, seier Støre.

EU har mål om netto nullutslepp innan 2050 og la i fjor sommar fram ein omfattande klimapakke, kalla «Fit for 55», med forslag til korleis dette kan oppnåast.

Fleire av forslaga har vekt reaksjonar i Noreg, mellom anna har både norsk industri og Senterpartiet åtvara mot å innføre ein eigen klimatoll. Arbeidarpartiet har på si side vore positivt innstilt til EUs storstilte klimaplan.

Leiar havpanelet

Det er likevel havet som står sentralt på toppmøtet i Brest, som blir avslutta fredag. Målet er at deltakarnasjonane skal komme fram til tiltak som kan verne livet i havet mot klimaendringar og forureining.

Frankrike er arrangør i kraft av at landet har formannskapet i EU.

Støre tok i fjor over leiinga av det internasjonale høgnivåpanelet for ein berekraftig havøkonomi. Han etterfølgde tidlegare statsminister Erna Solberg (H).

Havpanelet, som består av sitjande stats- og regjeringssjefar frå 14 land, har forplikta seg til berekraftig forvaltning av 100 prosent av hav- og kystområda sine innan 2025.

(©NPK)