Skuffa over at Senterpartiet ikkje sette foten ned i abortspørsmålet
ABORT: Den nye regjeringa vil utgreie alternativ til abortnemnd, og fristille representantane i Stortinget. KrF er skuffa over at Senterpartiet ikkje har gjort meir for å hindre endring i abortlova.
– Vi er skuffa over at Senterpartiet ikkje klarte å sette foten heilt ned, seier fungerande KrF-leiar Olaug Bollestad.
Den nye Støre-regjeringa vil sette ned eit utval som blant anna skal greie ut alternativ til dagens abortnemnder. Samstundes vil regjeringspartia stå fritt til å søke fleirtal i Stortinget for sine standpunkt om abortlova. Det går fram av den nye regjeringsplattforma som vart forhandla fram mellom Arbeidarpartiet og Senterpartiet i Hurdal.
Arbeidarpartiet har programfesta å fjerne abortnemndene og utvide retten til sjølvbestemt abort til veke 18, medan Senterpartiet gjekk til val på å bevare den noverande abortlova. Bollestad seier at ho hadde håpa Senterpartiet skulle sette foten ned for å fjerne nemndene og utvide abortgrensa, men ho er likevel ikkje avvisande til at eit utgreiingsarbeid kan vere nyttig.
