Røde Kors uroa: – Pandemien har lagt grunnlag for varige forskjellar og utanforskap
LANGTIDSVERKNAD: – Ein kan ikkje setje sprøyter mot einsemd, overgrep og mishandling, seier generalsekretær i Røde Kors. Deira nye rapport viser at samfunnet kan slite med konsekvensane av koronapandemien i lang tid framover.
Generalsekretær i Røde Kors, Bernt G. Apeland, er redd koronaepidemien også på sikt vil føre til eit samfunn med auka forskjellar og einsemd.
Maria Korkunc/Røde Kors,
– Det denne rapporten viser, er at me har ein stor jobb framfor oss. Dugnaden stoppar ikkje når siste vaksine er sett, seier Bernt G. Apeland, generalsekretær i Norges Røde Kors.
Han siktar til ein ny rapport organisasjonen har laga, der ein har sett på humanitære konsekvensar i kjølvatnet av koronapandemien. Apeland er spesielt uroa for langtidsverknadane det siste året og tida framover har for barn og unge.
– Ein av seks barn har opplevd vald og overgrep medan skulane var stengde. Det er eit stort omfang, og det er klart dette set spor i mange år framover, og for nokon kanskje for resten av livet.
