Regjeringa fryktar integreringsproblem om dei hentar 2.000 kvoteflyktningar
STATSBUDSJETTET: Rekordmange menneske er flyktningar, men regjeringa halverer talet på kvoteflyktningar.
TRONGARE PORT: Justisminister Emilie Mehl (Sp) ønskjer berre 1.000 kvoteflyktningar til Norge neste år.
Ole Berg-Rusten/NPK
Nesten 110 millionar menneske er på flukt i verda i dag, opplyser FN. Rundt 46 millionar har kryssa ei landegrense. Justisminister Emilie Mehl (Sp), som har ansvaret for asyl- og flyktningpolitikken, melder i statsbudsjettet at Norge har berre høve til å ta 1.000 kvoteflyktningar – eller overføringsflyktningar – neste år.
Justisdepartementet forklarar det slik:
«Regjeringa meiner at talet på overføringsflyktningar må sjåast i samanheng med talet på asylsøkarar og andre innvandrings- og integreringsutfordringar i Noreg. Noreg har vore blant landa som har teke imot flest overføringsflyktningar dei siste åra, sett i forhold til folketalet. Krigen i Ukraina har leidd til historisk høge asylinnkomstar til Noreg. Nivået for 2024 er òg venta å vere høgare enn normalt. Derfor foreslår regjeringa å redusere kvoten for overføringsflyktningar frå 2.000 plassar i 2023 til 1.000 plassar i 2024.»
