Frp ber Brenna svare på 22 spørsmål
Stortingets kontrollkomité møtest onsdag for å diskutere kunnskapsminister Tonje Brennas habilitet. Frp vil ha svar på ei lang rekkje spørsmål.
Frp-leiar Sylvi Listhaug lurer først og fremst på korleis det kunne gå over tre månader frå Frode Elgesem bad statsråden vurdere habiliteten sin, til ho faktisk erklærte seg inhabil overfor han.
– Korleis kunne ho, etter å ha fått eit slikt «varsel», likevel ta initiativ til å spele inn han som styremedlem i Wergelandssenteret? Det er veldig vanskeleg å forstå, seier Listhaug til NRK.
Annonse
Tysdag vart det kjent at kunnskapsminister Tonje Brenna (Ap) gav eit styreverv i stiftinga Wergelandssenteret til lagdommar Frode Elgesem, som ho no har erklært seg inhabil overfor.
Stiftinga har gitt pengar til Utøya AS, der tre styremedlemmer er nære venner av Brenna. Brenna har erklært seg inhabil også overfor desse.
Onsdag møtest kontroll- og konstitusjonskomiteen på Stortinget for å diskutere saka. Forutan Frp, har både Høgre og Venstre kravd at Brennas habilitet hamnar på bordet til komiteen.
Komiteen skal først drøfte saka og sende skriftlege spørsmål til statsråden. Deretter kan det bli opna kontrollsak, som seinare kan ende med høyring på Stortinget.
